Пазабіржавы рынак пераваліў за 7000, наяўны «штарміць» у дыяпазоне 4700-6100

Курс наяўнага даляра перавысіў 6000 беларускіх рублёў.

Даведзеная ўчора банкам адразу пасля абеду «слабільная» рэкамендацыя па курсаўтварэнні на наяўным сегменце валютнага рынку ў выглядзе абмежавання ў 4500 рублёў за даляр неадкладна адбілася на каціроўках пазабіржавага і чорнага наяўнага рынку, піша АФН.

Ужо бліжэй да вечара панядзелка банкі былі гатовыя набываць валюту па 6400-6500 рублёў за даляр, але такі курс відавочна не цешыў патэнцыйных прадаўцоў валюты, гатовых узяць чарговую курсавую планку ў 7000 рублёў за даляр.

У аўторак раніцай банкі не вырашыліся выстаўляць двухбаковыя каціроўкі, заявіўшы толькі аб гатоваасці купляць валюту па 6500-6600 за даляр. Між тым, уладальнікі валюты (гаворка аб буйных экспарцёрах) ужо вызначыліся з курсам продажу, які, на іхнюю думку, на дадзены момант павінен быць ніяк не ніжэй за 7200 рублёў за даляр.

На чорным наяўным рынку валюты сітуацыя не адрозніваецца стабільнасцю курсаў - у панядзелак пасля абеду валюту можна было купіць у дыяпазоне 4700-5600 рублёў за даляр у залежнасці ад сумы пакупкі і такога фактару «каму як пашанцавала». Сёння раніцай заяўлены курс продажу валюты ў асобных выпадках дасягаў 6100 рублёў (пераадоленая планка ў 6 тыс.). Аднак найбольш распаўсюджаная каціроўка трымаецца на ўзроўні 5500 рублёў. Па такім жа курсе пералічваюць кошт тавары і прадаўцы буйных менскіх рынкаў.

У цэлым рынак усё яшчэ абкатвае новыя ўмовы, абвешчаныя ўчора Нацбанкам РБ праз павышэнне афіцыйнай абмежавальнай столі з 4000 да 4500 на наяўным сегменце, і адначасова праяўляе асцярожнасць, будучы гатовым да чарговай нечаканасці з боку рэгулятара.