Паседжаньне па пазове аб закрыцці газеты «Наша Ніва» адбудзецца 11 мая

Падрыхтоўчае судовае паседжаньне па пазове Міністэрства інфармацыі Беларусі аб закрыцці газеты «Наша Ніва» адбудзецца 11 мая, гаворыцца ў апублікаваным на сайце газеты паведамленні.

Там адзначаецца, што адпаведнае паведамленне рэдакцыя газеты «Наша Ніва» атрымала з Вышэйшага гаспадарчага суду.

Як паведамлялася раней, міністэрства інфармацыі Беларусі падала пазоўныя заявы ў Вышэйшы гаспадарчы суд аб спыненні выпуску апазіцыйных газет «Народная воля» і «Наша Ніва». Пазоўныя заявы пададзеныя ў адпаведнасці з падпунктам 2.2. пункту 2 арт.51 закона Рэспублікі Беларусь «Аб сродках масавай інфармацыі», згодна з якімі орган дзяржкіравання ў сферы масавай інфармацыі можа прад'явіць у суд пазоў аб спыненні выпуску сродку масавай інфармацыі ў выпадку вынясення выданню на працягу года двух і болей пісьмовых папярэджанняў. Апазіцыйныя газеты ўжо атрымалі пісьмовыя папярэджанні за публікацыі аб падзеях 19 снежная мінулага года і аб выбуху ў менскім метро 11 красавіка.