Расейскага журналіста пазбавілі акрэдытацыі

Грамадзяніна Расеі, рэдактара інфармацыйнага агенцтва «Свабода» Аляксандра Лашманкіна пазбавілі акрэдытацыі ў беларускім Міністэрстве замежных спраў.

Пра гэта журналіст паведаміў «Радыё Свабода».

«Сёння я зайшоў у МЗС за карткай, і мне сказалі, што я пазбаўлены акрэдытацыі. Падставаў не патлумачылі і сказалі заўтра прыйсці за выпіскай. Мабыць, тут не патрэбныя такія журналісты, як я. Тут патрэбныя людзі, якія апісваюць падзеі з таго пункту гледжання, якая выгадная для Аляксандра Лукашэнкі. Я не гатовы гэта рабіць. Я лічу, што я аб'ектыўны. Таму што планаваў такім быць. Ну што ж, цяпер мне гэта рабіць значна лягчэй», - сказаў Аляксандр Лашманкін.

У беларускім МЗС заявілі, што Лашманкін пазбаўлены акрэдытацыі «у сувязі з парушэннем беларускага заканадаўства».

Свой арышт у Беларусі журналіст лічыць незаконным.

«Мне інкрымінаванае тое, чаго я не рабіў. Гэта міліцэйская правакацыя. Нібыта пад канвоем, калі мяне вялі ад цягніка да дзяжурнай часткі, я мацюкаўся на адрас міліцыянтаў. Вядома, гэта беззаконне. Гэтае рашэнне суда абскарджанае», - сказаў журналіст.

Аляксандр Лашманкін адбываў трое сутак арышту ў ізалятары часовага ўтрымання.

«Там ёсць такі элемент рэжыму, які я прыраўноўваюць да ўтрымання ў карцэры. Там нельга знаходзіцца на ложку з 6 гадзін раніцы да 22 гадзін. Гэта даволі складана вытрымаць нязвыклым чалавеку», - кажа журналіст.

Аляксандр Лашманкін адбыў трое сутак арышту ў Беларусі за хуліганства. У ноч на 24 сакавіка яго затрымала транспартная міліцыя ў Воршы. Супрацоўнікі праваахоўных органаў ссадзілі яго з цягніка Чалябінск - Брэст. 24 сакавіка ў Воршы ён быў асуджаны судом на трое сутак адміністрацыйнага арышту за хуліганства. У знак нязгоды з рашэннем суда Лашманкін абвясціў галадоўку.