Ліпковіч спаліў кнігі Чаргінца (Фота)
61- 19.03.2011, 20:15
19 сакавіка ў Севастопальскім скверы сталіцы прайшло святкаванне Дня абароны маладой беларускай маральнасці.
Удзельнікі літаратурна-мастацкай акцыі прынеслі з сабой кнігі Мікалая Чаргінца, з якіх распалілі вогнішча, паведамляе БелаПАН.
Дзень абароны маладой беларускай маральнасці святкуецца ў другі раз, адзначае арганізатар акцыі вядомы беларускі блогер Яўген Ліпковіч.
«Маладая беларуская маральнасць мае патрэбу ў абароне, падобныя мерапрыемствы наогул павінныя стаць штодзённымі. Вось калі прачнуўся раніцай, заўважыў дзе-небудзь кнігі Чаргінца, Рубінава, тэлевізар з беларускім каналам... Не разграміў тэлевізар, не спаліў Чаргінца - дзень пражыты дарма, маральнасць пацярпела», - лічыць Ліпковіч.
Нагадаем, у мінулым годзе Беларускі грамадскі савет па маральнасці, які ўзначальвае Мікалай Чаргінец, запатрабаваў ад арганізатараў канцэрту Rammstein у Менску зрабіць папярэдні прагляд праграмы выступу гурта. У савеце палічылі, што музыкі будуць «руйнаваць беларускую дзяржаўнасць».
