У Менску забаронены канцэрт Neuro Dubel

Канцэрт, прысвечаны выхаду трыб'юта Neuro Dubel, які павінен быў адбыцца ў менскім клубе «Рэактар», забаронены.

Гэта ўжо трэцяя забарона канцэртаў гуртоў з ананімнага «спісу забароненых», які міністр інфармацыі Праляскоўскі назваў «гнюснай фальшыўкай». І першы забаронены канцэрт у Менску пасля 2007 года.

Аляксандр Кулінковіч піша ў сваёй калонцы на Naviny.by, што канцэрт менавіта забаронены:

«Менавіта гэтае слова. Не перанесены, не адменены - ён ЗАБАРОНЕНЫ. Кіраўніцтва клуба выклікалі і прапанавалі выбіраць: альбо страта арандатара (Нейра Дзюбель), альбо страта клуба. Выдатны выбар. На пытанне «а чаму?» Было сказана наступнае: гурт падтрымліваў апазыцыю, і цяпер дзяржава не збіраецца... »

Пасля з'яўлення ў Сеціве «спісу забароненых» выказваліся шматлікія здагадкі, што гэта можа быць нечый піяр альбо спецыяльная правакацыя. Занадта дзіўны гэты спіс і ён, маўляў, не адпавядае ніякай логіцы, піша сайт generation.by.

Першыя забароны прайшлі ў рэгіёнах. Канцэрт гурта "Ляпіс Трубяцкой" не адбыўся 13 сакавіка ў Гомелі з-за рашэнні МНС, а ў Брэсце на днях без тлумачэнняў быў забаронены канцэрт Зміцера Вайцюшкевіча ў Тэатры Лялек, які быў запланаваны на 18 сакавіка.

Канцэрт Neuro Dubel павінен быў адбыцца ў «Рэактары» 24 сакавіка. Гурт Neuro Dubel ўжо была ў спісе забароненых у 2004-2007 гадах.