Сёння пройдзе развітанне з Алегам Бябеніным

Грамадзянская паніхіда па заснавальніку і кіраўніку сайта charter97.org адбудзецца 6 верасня з 14 да 15 гадзін у Менску.

Развітанне з Алегам Бябеніным пройдзе ў зале рытуальных паслуг па адрасе: вуліца Альшэўскага, 12.

Нагадаем, што цела Алега Бябеніна было знойдзена павешаным 3 верасня на яго лецішчы пад Менскам. Праваахоўныя органы паспяшаліся паведаміць, што гэта самагубства. Аднак калегі журналіста паведамляюць, што смерць Алега Бябеніна выклікае шмат пытанняў. Судмедэксперты блытаюцца нават у даце надыходу смерці журналіста. Алег Бябенін не пакінуў пасля сябе ніякай запіскі. Ён быў поўны планаў. У журналіста засталіся жонка і два сыны. Ён быў асноўным удзельнікам каманды апазіцыйнага кандыдата ў прэзідэнты Андрэя Саннікава.

Учора палітык быў выкліканы на допыт у Менскую абласную пракуратуру Менска.

«У мяне з'явілася яшчэ больш сумненняў, што гэта было самагубства. Мне патлумачылі, што нават пра дату смерці Алега можна будзе казаць толькі пасля правядзення поўнай экспертызы, што можа заняць каля месяца. Таму ў мяне толькі ўзмацніўся недавер да афіцыйных заяваў МУС, якое ўжо выносіць сваё заключэнне пра прычыны смерці Алега Бябеніна. Таму што, калі яны не могуць з упэўненасцю вызначыць час смерці, як яны могуць казаць, з-за чаго чалавек памёр?», - сказаў Андрэй Саннікаў.

У той жа час каардынатар Хартыі'97 Дзмітрый Бандарэнка адзначыў:

«Існуюць сур'ёзныя разыходжанні па часе смерці, і гэта зафіксавана ў дакументах. Супрацоўнікі міліцыі і пракуратуры, сярод якіх быў эксперт-крыміналіст, якія прыбылі ўчора на лецішча, зафіксавалі, што смерць наступіла прыкладна ў 14 гадзін 3 верасня. У пасведчанні аб смерці, выдадзеным сваякам, датай смерці названа 2 верасня. Гэта значыць разыходжанне больш за 15 гадзін. Ёсць яшчэ маса іншых момантаў, якія прымушаюць нас сумнявацца ў тым, што Алег пайшоў з жыцця добраахвотна».