НТВ заявіла пра намер выпусціць «Хроснага бацьку-4»

Прадукт НТВ у выглядзе пакуль трохсерыйнага серыяла пра «беларускую рэчаіснасць» сваю галоўную місію выканаў.

Як пішуць «Беларускія навіны», «Хроснага бацьку» ужо які тыдзень глядзяць, абмяркоўваюць, каментуюць. Прычым трэцяя серыя справакавала ў многіх цікавасць перагледзець першыя дзве часткі фільма.

Пасля не паказанага ў нас 15 жніўня па тэлебачанні «ХБ-3» ён ужо на наступную раніцу на ўсю «гуляў» па лакальных сетках беларускіх міністэрстваў і ведамстваў. «Расправіліся» з ім у адміністрацыйным парадку толькі да аўторка. Так што ў чыноўніцкай браціі было шмат часу для запампоўкі і капіравання «кіна пра Бацьку», каб у хатняй абстаноўцы яго спакойна паглядзець.

Унутрана ўсе чакалі, што вось зараз, пасля такой агрэсіўнай інфармацыйнай атакі, Беларусь абавязкова адключаць ад расейскіх тэлеканалаў, а ў інтэрнэце пройдзе масавая зачыстка ўсяго, што ганіць і дыскрэдытуе з блакаваннем шкоднасных крыніц. Але ў адказ - цішыня, «Хросны бацька» «вісіць» і абмяркоўваецца на дзесятках беларускіх парталаў і, напэўна, на тысячах «імпартных», шматлікія з якіх з-за спецыфічнасці сваёй тэматыкі дагэтуль не выяўлялі цікавасці да беларускай унутранай палітыкі. Не абышлі ўвагай «ХБ» нават спартыўныя сайты і, выбачайце, рэсурсы, створаныя для аматараў «клубнічкі».

Зрэшты, гаворка зараз не пра гэта. Не мае значэння і спектр ацэнак фільма НТВ на шматлікіх форумах - ад пачуцця глыбокага задавальнення да пляўкоў у манітор пры віртуальных спрэчках: хто горш - «апошні дыктатар Еўропы» або Медзвепуты? Галоўнае пытанне, якое сёння павінна задавацца у галоўных кабінетах беларускай дзяржавы: як серыял наогул трапіў у эфір? Не ў тым сэнсе, хто і з якой прычыны даў каманду яго зняць і выпусціць, а хто празяваў і не апярэдзіў гэты інфармацыйны ўдар звонку.

Тым больш, што НТВ «адбамбілася» толькі з другога заходу на цэль. Каб стала зразумела, пра што гаворка, звернемся да тытраў першай серыі «Хроснага бацькі», паказанай 4 ліпеня ў праграме «Чрезвычайное происшествие»:

«Гэты фільм павінен быў выйсці на экран амаль год таму. Аднак здымачная група, якая працавала ў Беларусі, была затрыманая мясцовымі спецслужбамі і высланая з краіны. Касеты з запісамі былі канфіскаваныя. Мы лічылі іх зніклымі незваротна, але ў Менску знайшліся людзі, якім удалося адшукаць іх у сейфах КДБ Беларусі і вярнуць нам».

Такія затраўкі звычайна выкарыстоўваюцца тэлежурналістамі для прыцягнення і заваблівання ў сетку эфіру як мага большай колькасці гледачоў. Аднак у гэтым ёсць і доля праўды. Сапраўды, 14 жніўня 2009 года ў Менску была затрыманая здымачная група праграмы «Чрезвычайное происшествие», якая прыехала для здымкаў дакументальнага фільма пра зніклых у Беларусі ў розныя гады палітыкаў і журналістаў. Яны збіраліся адзняць інтэрв'ю з жонкамі і сваякамі бясследна зніклых людзей, але расейскія журналісты не былі акрэдытаваныя, а таму «людзі ў цывільным» папрасілі іх пакінуць краіну. Крыху пазней РІА «Новости» са спасылкай на прэс-службу НТВ паведаміла, што «са здымачнай групай ўсё добра, журналісты знаходзяцца ў Маскве», але прадстаўнік тэлекампаніі «адмовіўся раскрыць якія-небудзь іншыя падрабязнасці». Пра канфіскаваныя касеты з запісамі нічога не гаварылася. І вось знайшліся людзі, «якім удалося адшукаць іх у сейфах КДБ і вярнуць».

«Беларускія навіны» звярнуліся за каментаром да чалавека, у якога ёсць свая версія таго, што адбылося. Паводле яго просьбы прозвішча не называецца. Адзінае, гаворыцца, што ў апазіцыйных настроях ён ніколі заўважаны не быў. Наадварот, не раз быў адзначаны Лукашэнкам. Вось яго меркаванне:

- Падобныя фільмы павінны з'яўляцца з канкрэтнай мэтай да канкрэтнай падзеі. Ну, зрабілі б энтэвэшнікі гэтае кіно год таму, на яго б ужо ўсё забыліся. «Касеты з архіва КДБ» - гэта наогул смешна, тым больш што нічога ў іх асаблівага, мяркуючы па першай серыі «Хроснага бацькі», і не было.

А вось літаральна за некалькі дзён да прэзідэнцкіх выбараў 2006 года фільм, накіраваны супраць Бацькі, сапраўды павінен быў з'явіцца ў эфіры расейскіх тэлеканалаў. Сітуацыя тады была напружанай, паступала шмат супярэчлівай інфармацыі, ажно да магчымых тэрактаў; кожную трэба было правяраць і па кожнай прымаць рашэнне. Работы хапала ўсім... А тут яшчэ і расейскія тэлевізіёншчыкі панаехалі і распаўзліся па ўсёй краіне. Якіх-небудзь падрабязнасцяў не ведаю, не мая тэма, але тады «накрылі» шэсць груп журналістаў. Усіх выслалі без шуму і, зразумела, гэта наўрад ці магло перашкодзіць што-небудзь змайстраваць з падручнага матэрыялу, не выходзячы з маскоўскай студыі. Але ж нічога не з'явілася! Чаму? А вы ўзгадайце, хто тады ўзначальваў выбарчы штаб Лукашэнкі? Правільна, Віктар Шэйман. А гэты чалавек умее дамаўляцца. Шэйман дамовіўся, а таму ніякія «хросныя бацькі» і іншыя «фільмы жахаў» на экраны не выйшлі. З кім ён дамовіўся, ведае толькі ён.

- Як вы ацэньваеце сам факт выхаду «Хроснага бацькі»?

- Тое, што адбылося цяпер, гэта поўны правал працы спецслужбаў. Іншага і чакаць не варта было. Пасля адстаўкі Шэймана з усіх сілавых структур «сышлі» яго людзі, а гэта - прафесіяналы, якія маюць шматгадовы вопыт аператыўнай і следчай працы, якія мелі добрую агентурнай сетку, якая нідзе не засвеченая. Дакладна ведаю, што калі падчас той прэзідэнцкай кампаніі які-небудзь п'яны старшыня калгаса з Палесся бегаў увечары па вёсцы і крычаў: «Тут я вам прэзідэнт!", то праз пару гадзін на стале ў Шэймана ўжо ляжаў падрабязны рапарт. Шэйман заўсёды ацэньваў магчымыя наступствы тых ці іншых дзеянняў. Калі быў варыянт вырашэння праблемы без шуму, то ён яго выкарыстоўваў. Такі яго прынцып.

Што тычыцца самога фільма ... Не кажучы пра яго «мастацкія» вартасці, здарылася тое, што не па душы любой ўладзе: людзі сталі задавацца пытаннямі, спрачацца, абменьвацца думкамі, значыць - палітызаваць. Асабіста я ў гэтым перакананы.

...НТВ ужо заявіла пра намер выпусціць чацвёртую серыю «Хроснага бацькі». Падобна, што загнаць гэтага джына назад у бутэльку да прэзідэнцкіх выбараў будзе немагчыма, адзначаюць «Беларускія навіны».