Лукашэнка баіцца расследавання справаў зніклых (Фота, відэа)

Сотні менчукоў выйшлі 16 жніўня на акцыю «Патрабуем міжнароднага расследавання справаў зніклых!». Мірная акцыя скончылася арыштамі.

Акцыя пад лозунгам «Патрабуем міжнароднага расследавання справаў зніклых!» распачалася ў 18.00 ля будынка Акадэміі навук. Больш за дзвесце чалавек выйшлі на вуліцу з партрэтамі выкрадзеных беларусаў – віцэ-спікера Вярхоўнага Савета Віктара Ганчара, былога міністра ўнутраных справаў Юрыя Захаранкі, журналіста Дзмітрыя Завадскага і бізнэсмэна і грамадскага дзеяча Анатоля Красоўскага. Тыя, хто сабраўся, сталі ля праезджай часткі праспекта Незалежнасці.

У акцыі ўдзельнічалі лідэр грамадзянскай кампаніі «Еўрапейская Беларусь» Андрэй Саннікаў, які заявіў пра намер балатавацца ў прэзідэнты Беларусі, кіраўнік менскай гарадской арганізацыі партыі БНФ Віктар Івашкевіч, старшыня Аб'яднанай грамадзянскай партыі Анатоль Лябедзька, лідэр кампаніі «Гавары праўду» Уладзімір Някляеў, адзін з лідэраў Партыі БНФ Алесь Мех, кіраўнік «Свабоднага тэатра» Мікалай Халезін, вядомая журналістка Ірына Халіп і яе бацька, рэжысёр Уладзімір Халіп, старшыня Рады беларускай інтэлігенцыі Уладзімір Колас, моладзевыя лідэры Павал Юхневіч, Максім Вінярскі, Яўген Афнагель, Мікола Дземідзенка, і іншыя.

Супрацоўнікі міліцыі папярэджвалі тых, хто сабраўся, праз мегафон, што акцыя нібыта не санкцыянаваная, хаця, паводле пастановы Вярхоўнага суда Рэспублікі Беларусь, стаянне людзей з партрэтамі на вуліцы не парушае ніякіх законаў. Усіх, хто ішоў у гэты час да Акадэміі навук, абшуквалі супрацоўнікі міліцыі ў цывільным, прымушаючы паказваць змесціва заплечнікаў і торбаў.

Тым не менш мерапрыемства прыцягнула велізарную колькасць мінакоў, больш за сотню чалавек стаялі на супрацьлеглым баку ад Акадэміі навук і назіралі за яе правядзеннем. Машыны сігналілі ў знак салідарнасці з удзельнікамі акцыі.

Тым не менш далучыцца да акцыі шмат хто не змог. Роўна ў 18.00 міліцыянты перасталі пускаць людзей да Акадэміі навук. Міліцыянты, якія дзяжурылі ў пераходах, заварочвалі людзей назад. Да Акадэміі навук прыбыў нават начальнік ГУУС Менгарвыканкама генерал-маёр міліцыі Леанід Фармагей.

Праз паўгадзіны людзі сталі разыходзіцца, аднак на моладзевых лідэраў, якія падавалі ў Менгарвыканкам заяўку з просьбай дазволіць правядзенне акцыі, накінуліся супрацоўнікі міліцыі ў цывільным. Першым быў арыштаваны актывіст «Еўрапейскай Беларусі» Яўген Афнагель. Затым супрацоўнікі міліцыі спрабавалі затрымаць аднаго з лідэраў «Еўрапейскай Беларусі» Паўла Юхневіча. Удзельнікі акцыі змаглі абараніць моладзевага лідэра. Тым не менш, ён быў збіты, яму падралі кашулю. У адказ людзі абступілі маёра ГУУС, які аддаў загад аб арышце моладзевых лідэраў, і скандавалі «Жыве Беларусь!». Пазней Юхневіч усёткі быў затрыманы – калі ўсе разашліся.

Арыштаваныя таксама актывісты «Еўрапейскай Беларусі» Максім Сергіец і Андрэй Моўчан, актывіст «Моладзі БНФ» Антон Койпіш. Затрыманых даставілі ў Першамайскі РАУС і вызвалілі праз тры гадзіны без складання пратаколаў.

За акцыяй «Патрабуем міжнароднага расследавання» назіралі прадстаўнікі амбасадаў ЗША, Францыі, Венгрыі, Літвы, Эстоніі, Чэхіі і іншых краінаў.

Удзельнікі акцыі патрабавалі правядзення міжнароднага расследавання выкраданняў і забойстваў у Беларусі ў 1999-2000 гадах былога міністра ўнутраных справаў Юрыя Захаранкі, віцэ-спікера Вярхоўнага Савета Віктара Ганчара, журналіста Дзмітрыя Завадскага, бізнэсмэна і грамадскага дзеяча Анатоля Красоўскага.

P.S. Падчас акцыі журналіст сайта charter97.org Наталля Радзіна пацікавілася ў супрацоўнікаў АМАПа ў цывільным, якія дзяжурылі на акцыі ля Акадэміі навук, ці глядзелі яны напярэдадні фільм НТВ «Хросны бацька»? Амапаўцы напаўголасу адказалі: «Яшчэ не паспелі, але на флэшцы ўжо ёсць…». А потым уздыхнулі і дадалі: «Такая ў нас праца – хроснага бацьку абараняць…»

Відэа: "Наша ніва"

Лідэр «Еўрапейскай Беларусі» Андрэй Саннікаў і яго жонка Ірына Халіп

фота: "Радыё Свабода"