У Беларусі правіла ўваходу ў інтэрнэт-кавярню больш жорсткія, чым у Кітаі

Колькасць наведвальнікаў інтэрнэт-кавярняў зменшылася. Шмат хто абураны новымі правіламі.

Журналісты, вывучыўшы беларускія і кітайскія правілы ўваходу ў інтэрнэт-кавярні, паспрабавалі без пашпарта патрапіць у некалькі такіх менскіх установаў.

«Вы што, і ў краме ў парадку выключэння прадукты без грошай папросіце?!», — нахмурыўшыся, адрэагавала супрацоўніца аднаго з аддзяленняў «Белтэлекам», піша «Салідарнасць».

Для пачатку нагадаем, што з 1 ліпеня ў Беларусі (пасля ўступлення ў сілу ўказу №60 — аб рэгуляванні нацыянальнага сегмента сеткі інтэрнэт) скарыстацца паслугамі інтэрнэт-кавярні стала магчымым толькі з падаваннем дакумента, які засведчвае асобу.

Пасля азнаямлення з матэрыялам «Як кітайскія ўлады абмяжоўваюць свабоду ў Інтэрнэце» журналісты высветлілі, што пры ўваходзе ў інтэрнэт-кавярню Паднябеснай карыстальніку таксама неабходна зарэгістравацца. Праўда, для гэтага дастаткова назваць свае імя-прозвішча. І хто сказаў, што яны павінны быць сапраўдныя? Праблемы будуць, толькі калі ва ўстанову нечакана з'явіцца інтэрнэт-паліцыя і пачне зверку дадзеных у рэгістрацыйнай кнізе з дакументамі наведвальнікаў.

Карэспандэнт «Салідарнасці» паспрабавала прайсці ў некалькі менскіх інтэрнэт-кавярняў па кітайскіх правілах. І вось што з гэтага выйшла…

Для пачатку журналіст зазірнула ў адну з самых папулярных сталічных кавярняў — «Саюз Online».

— Патрэбны дакумент, які засведчвае асобу, — пачала адміністратарка Анастасія.

— Пашпарт забылася, але тэрмінова трэба праверыць электронную пошту… Можна я назаву свае імя і прозвішча, і вы мяне так зарэгіструеце — у парадку выключэння, — паспрабавала журналістка.

— Не-не, прабачце. Такіх выключэнняў мы не робім, — здзівіўшыся маёй просьбе, адказала яна.

Як, у цэлым, людзі рэагуюць на новыя правілы? Высветлілася, што хтосьці за месяц прызвычаіўся, і ўжо ўвесь час носіць з сабой дакументы. Але хтосьці ўсёткі абураецца.

— А праверкі былі?

— Пакуль не.

— Колькасць наведвальнікаў, па вашых назіраннях, скарацілася?

— Так, — адразу адказвае Анастасія. — Статыстыкі за гэты месяц пакуль не маем, але, візуальна, людзей прыходзіць на парадак менш. Магчыма яшчэ і спякота паўплывала…

Наступным пунктам, куды журналіст адправілася з «хатняй загатоўкай», стала аддзяленне «Белтэлекам» на вуліцы Энгельса.

— Вы што?! А ў краме — у парадку выключэння — прадукты таксама без грошай папросіце, — панура, аглядаючыся на калегаў, адказала супрацоўніца Марына Фёдараўна.

Затое на пытанне, ці не стала менш людзей карыстацца гэтай паслугай, адказала ўпэўнена і спакойна.

— Колькасць карыстальнікаў зменшылася. Шмат хто абураны новымі правіламі і прынцыпова адмаўляецца браць кампутар. А некаторыя проста не носяць з сабой дакументы, — падагульніла яна, паказваючы на замацаваную перад сабой на шкле аб'яву для кліентаў.

А яна абвяшчае: «…Падаванне паслугі доступу ў сеткі Інтэрнэт і продаж Wi-Fi толькі па дакуменце, які засведчвае асобу. Прозвішча, імя, імя па бацьку; від (назва і нумар) дакумента; назва органа, які яго выдаў».

Сапраўды, гэта нам не Кітай.