«Беларуськалій» і нафтаправоды - на продаж?

РУП «ПА» Беларуськалій «выведзены з пераліку аб'ектаў, якія знаходзяцца ў выключнай уласнасці дзяржавы.

Пра гэта паведаміла журналістам дырэктар Фонду дзяржаўнай маёмасці Дзяржкаммаёмасці Беларусі Наталля Жарнасек, пасля прыняцця «палатай прадстаўнікоў» у другім чытанні законапраекта аб аб'ектах, якія знаходзяцца ў выключнай уласнасці дзяржавы, паведамляе «Інтэрфакс».

«Здабыча калійных угнаенняў выключаная з пераліку аб'ектаў, якія знаходзяцца ва ўласнасці дзяржавы і цяпер можа быць прынята рашэнне аб стварэнні акцыянернага таварыства на яго базе», - сказала Н. Жарнасек

Па яе словах, ужо завершаныя ўсе падрыхтоўчыя работы да пераўтварэнняў Беларуськалія з рэспубліканскага унітарнага прадпрыемства ў адкрытае акцыянернае таварыства. У прыватнасці, падрыхтаваны дакументы па фарміраванні статутнага фонду і падрыхтавана рынкавая ацэнка кошту Беларуськалія. Пры гэтым М. Жарнасек не назвала канкрэтныя лічбы, спаслаўшыся на тое, што фармальна рашэнне аб акцыянаванні Беларуськалія яшчэ не прынятае. Акрамя таго, «рашэнне аб стварэнні акцыянернага таварыства не азначае аўтаматычную яго прыватызацыю». «Пытанне аб прыватызацыі Беларуськалія пакуль не стаіць», - сказала яна, нагадаўшы, што ў Беларусі створана больш за 2 тыс. ААТ, у якіх пераважае доля дзяржавы.

У той жа час за ўсю гісторыю пераўтварэнняў дзяржуласнасці ў Беларусі «такога статутнага фонду, як у Беларуськалія, у нас яшчэ не было. Гэта вельмі фондаёмкае прадпрыемства - пяць дзеючых рудняў, адзін будуецца, яшчэ па адным ідзе разведка», - адзначыла Н. Жарнасек, дадаўшы, што «кошт асноўных фондаў Беларуськалія вельмі вялікі».

Дырэктар фонду таксама паведаміла, што ў адпаведнасці з прынятым законапраектам з пераліку аб'ектаў, якія знаходзяцца ў выключнай уласнасці дзяржавы, выведзеныя магістральныя нафтаправоды. Яна нагадала, што фонд дзяржмаёмасці скончыў усе падрыхтоўчыя работы па акцыянаванні РУП «Гомельтранснафта «Дружба» і наваполацкага РУП па транспарце нафты «Дружба» яшчэ ў канцы 2009 года. Аднак рэфармаваць гэтыя аб'екты не дазвалялі заканадаўчыя ўмовы.

Дадзены законапраект, пасля яго прыняцця ў другім чытанні «палатай прадстаўнікоў» у чацвер, будзе разгледжаны «саветам рэспублікі» 30 чэрвеня гэтага года. Пасля чаго прыняты законапраект будзе ўнесены на подпіс Лукашэнку.