АБСЕ стала на абарону незалежных беларускіх журналістаў

Прадстаўніца АБСЕ рэзка раскрытыкавала пераслед беларускіх журналістак і крымінальныя справы супраць сайта charter97.org.

Прадстаўніца Арганізацыі па бяспецы і супрацоўніцтве ў Еўропе па пытаннях свабоды СМІ Дуня Міятавіч выказала ў панядзелак занепакоенасць апошнімі паведамленнямі аб ціску на незалежныя СМІ Беларусі, паведаміла прэс-служба АБСЕ.

«Запалохванне журналістаў аказвае стрымальны эфект на і без таго саслабленую практыку журналісцкіх расследаванняў у Беларусі», - кажацца ў яе пасланні ў адрас кіраўніка беларускага МЗС Сяргея Мартынава.

«Улады павінны актыўна расследаваць выпадкі ціску на журналістаў і выконваць абавязальніцтвы па абароне СМІ, прынятыя імі ў межах АБСЕ», - адзначаецца ў дакуменце.

У апошні час журналісты, якія асвятлялі так званую «паляўнічую справу», зведалі пераслед з боку праваахоўных органаў. У сакавіку рэдактарка сайта charter97.org Наталля Радзіна, менская карэспандэнтка расейскай «Новой газеты» Ірына Халіп і журналісткі газеты «Народная Воля» Святлана Калінкіна і Марына Коктыш былі дапытаныя, у іх кватэрах і офісах адбыліся ператрусы, а тэхніка і працоўныя матэрыялы былі канфіскаваныя. Падчас ператруса Наталлю Радзіну ўдарылі. 28 красавіка следчыя паведамілі журналістам, што па іх кампутарах будзе паведзеная далейшая праверка з мэтай атрымання доступу да скрыняў іх электроннай пошты і ўліковых запісаў у «Скайпе».

«У сакавіку я ўжо звяртала ўвагу беларускіх уладаў на гэтыя выпадкі. Я занепакоеная тым, што ціск на журналістак у апошні час узмацніўся, нягледзячы на тое, што гэтыя чатыры супрацоўніцы СМІ - не падазраваныя ў гэтай справе, а толькі сведкі», - паказвае Міятавіч.

Прадстаўніца АБСЕ па свабодзе СМІ таксама раскрытыкавала беларускія ўлады ў сувязі з крымінальнай справай аб паклёпе, заведзенай па факце размяшчэння на сайце charter97.org каментароў карыстальнікаў да артыкула, апублікаванага летась «Советской Белоруссией».

Міятавіч таксама выказала расчараванне тым, што заканадаўства аб рэгуляванні Інтэрнэту ў Беларусі было прынятае без папярэдняга грамадскага абмеркавання.