Прысуд па справе Аўтуховіча будзе вынесены 6 траўня
2- 21.04.2010, 9:30
У сваім апошнім слове ў Вярхоўным судзе ваўкавыскія прадпрымальнікі сваёй віны не прызналі.
Падпалкоўнік міліцыі Казлоў папрасіў прабачэння ў Аўтуховіча і Асіпенкі за дзеянні сваіх былых калегаў.
Як паведаміў «Салідарнасці» старшыня Руху Салідарнасці «Разам» Вячаслаў Сіўчык, на паседжанні Вярхоўнага суда 20 красавіка першым з чатырох абвінавачваных апошняе слова прамовіў Мікалай Аўтуховіч, апошнім – Аляксандр Ларын.
Прадпрымальнікі з Ваўкавыска Мікалай Аўтуховіч і Уладзімір Асіпенка, якіх абвінавачваюць у падрыхтоўцы тэрарыстычнага акту ў дачыненні да намміністра па падатках і зборах і экс-старшыні Гарадзенскага аблвыканкама, а таксама ў падпале дома былога начальніка Ваўкавыскага РАУС, сваёй віны не прызналі. Яны заявілі, што крымінальныя справы сфабрыкаваныя і з'яўляюцца пераследам за спробу барацьбы з карупцыяй у Гарадзенскай вобласці.
Падпалкоўнік міліцыі Міхаіл Казлоў, які абвінавачваецца ў тым, што ведаў пра планы падрыхтоўкі тэрарыстычнага акту, але не прыняў мераў па яго прадухіленні, папрасіў прабачэння ў Аўтуховіча і Асіпенкі за дзеянні сваіх былых калегаў. Ён канкрэтна назваў артыкулы Крымінальнага кодэкса, якія парушылі следчыя.
Выступ Аляксандра Ларына, якія даў паказанні супраць Аўтуховіча і Асіпенкі, па словах Вячаслава Сіўчыка, звязанасцю і логікай не адрозніваўся.
Рашэнне па крымінальных справах Вярхоўны суд вынесе 6 траўня.
Нагадаем, пракурор Эльдар Сафараў запатрабаваў прысудзіць Аўтуховіча да 20 гадоў калоніі ўзмоцненага рэжыму з канфіскацыяй маёмасці, Асіпенку і Ларына – да 11 гадоў пазбаўлення волі ў калоніі ўзмоцненага рэжыму. Для Міхаіла Казлова ён запрасіў тры гады калоніі агульнага рэжыму без права займаць кіраўнічыя пасады.
