МЗС Польшчы: У адказ на рэпрэсіі могуць быць уведзеныя санкцыі

Намеснік міністра замежных спраў Польшчы Анджэй Крэмер правёў сёння брыфінг, падчас якога распавёў аб выніках абмеркавання ў МЗС сітуацыі з Саюзам палякаў Беларусі.

Намеснік міністра замежных спраў заявіў, што Польшча выказвае глыбокую занепакоенасць пагаршэннем сітуацыі з Саюзам палякаў Беларусі. Анджэй Крэмер нагадаў, што падчас перамоваў з беларускім міністрам замежных спраў кіраўнік МЗС Польшчы Радаслаў Сікорскі ясна паказаў дзве магчымасці развіцця адносін Польшчы і Еўразвяза з Беларуссю: працяг развіцця кантактаў альбо іх «замарозка».

Паводле словаў намесніка міністра, Польшча зацікаўлена ў захаванні пакрокавага развіцця партнёрства з Беларуссю, але пры поўнай павазе дэмакратычных прынцыпаў, а таксама пры выкананні Беларуссю патрабаванняў вылучаных ЕЗ, у тым ліку забеспячэння свабоды дзейнасці апазіцыйных партый і няўрадавых арганізацый, змяненні закона аб СМІ, выбарчага заканадаўства і г. д.

Міністэрства замежных спраў Польшчы лічыць, што сённяшнія рэпрэсіі супраць актывістаў Саюза палякаў Беларусі - гэта працяг незаконных дзеянняў беларускіх уладаў, якія пачаліся на мінулым тыдні. МЗС чакае, што беларускія ўлады неадкладна спыняць падобныя дзеянні. Анджэй Крэмер нагадаў, што раней у кантактах з беларускімі афіцыйнымі асобамі абмяркоўвалася пытанне поўнага ўрэгулявання праблемы польскай меншасці і арганізацыі, якая прадстаўляе яго інтарэсы.

Пры гэтым Міністэрства замежных спраў Польшчы лічыць, што казаць пра тое, што яго палітыка ў адносінах да Беларусі пацярпела фіяска, заўчасна.

Міністэрства замежных спраў Польшчы праінфармавала органы Еўрапейскага Звяза і АБСЕ аб сітуацыі вакол польскай меншасці ў Беларусі. Міністр Сікорскі ўнёс прапанову аб уключэнні беларускага пытання ў парадак дня сустрэчы міністраў замежных спраў ЕЗ на наступным тыдні, каб выпрацаваць агульную пазіцыю міністраў у адносінах да Беларусі.

Намеснік міністра замежных спраў Польшчы Анджэй Крэмер падкрэсліў, што, калі беларускае кіраўніцтва не спыніць рэпрэсіі ў дачыненні да польскай меншасці, гэта прывядзе да самаізаляцыі Беларусі. Ён таксама заявіў, што Польшча не выдасць уязных віз асобам, адказным за рэпрэсіі супраць Саюзу палякаў Беларусі, якім кіруе Анжаліка Борыс, у тым ліку членам так званага праўладнага Саюза палякаў.

Тым часам кіраўнік канцылярыі прэзідэнта Польшчы Станіслаў Стасяк падкрэсліў, што праблема рэпрэсій супраць польскай меншасці ў Беларусі настолькі важна, што прэзідэнт лічыць неабходным сустрэчу з міністрам замежных спраў. Лех Качыньскі мае намер даведацца, якія крокі Польшча распачала ў сувязі з дзеяннямі беларускіх уладаў. «Прэзідэнт Польшчы лічыць, што неабходна зрабіць рашучыя, і, перш за ўсё, эфектыўныя крокі, каб абараніць палякаў у Беларусі», - заявіў Станіслаў Стасяк.

Міністр канцылярыі прэзідэнта Польшчы Павал Выпых у каментарах для тэлебачання TVN24 сказаў, што прэзідэнт Качыньскі занепакоены рэпрэсіямі, якія ўзмацняюцца, у дачыненні да польскай меншасці і, што палітыка саступак не прынесла чаканых вынікаў. Па яго словах, у гэтай сітуацыі неабходны зразумелы сігнал для Беларусі з боку Еўрапейскага Звяза.

«Міністр Сікорскі абяцаў, што ў яго з беларускім міністрам адбудзецца сур'ёзная мужчынская размова, але здаецца, што беларускі бок ўвогуле не ўсвядоміў, што такая размова адбылася», - лічыць прадстаўнік прэзідэнта Польшчы.