Януковіч запрасіў Лукашэнку на інаўгурацыю
19- 12.02.2010, 16:21
Беларускі кіраўнік падчас тэлефоннай размовы павіншаваў Віктара Януковіча з перамогай на прэзідэнцкіх выбарах.
Таксама Аляксандр Лукашэнка выказаў упэўненасць, што добрасуседскія адносіны паміж краінамі будуць дынамічна развівацца на прынцыпах даверу і ўзаемапавагі. Пра гэта, як перадае БелаПАН, паведаміла 12 лютага прэс-служба Партыі рэгіёнаў, якую ўзначальвае Януковіч.
Януковіч «цёпла падзякаваў за віншаванні і запрасіў Аляксандра Лукашэнку на цырымонію інаўгурацыі кіраўніка ўкраінскай дзяржавы».
«Мы гатовыя да далейшага ўмацавання братэрскіх і добрасуседскіх адносін паміж Украінай і Рэспублікай Беларусь», - заявіў Януковіч падчас тэлефоннай размовы з Лукашэнкам.
Прэс-служба беларускага кіраўніка пра яго размову з Януковічам пакуль не паведамляла.
Паводле папярэдніх дадзеных, у другім туры прэзідэнцкіх выбараў 7 лютага Януковіч набраў 48,95% галасоў, прэм'ер-міністр Юлія Цімашэнка - 45,47%. Супраць абодвух кандыдатаў прагаласавала 4,36% выбаршчыкаў.
Канчатковыя вынікі выбараў павінны быць аб'яўлены да 17 лютага.
