Чавес збіраецца прызнаць незалежнасць Паўднёвай Асеціі і Абхазіі
14- 10.09.2009, 12:58
Пра гэта прэзідэнт Венесуэлы заявіў у першы дзень візіту ў Маскву, куды ён накіраваўся адразу з Менску.
На перамовах з прэзідэнтам РФ Дзмітрыем Мядзведзевым Уга Чавес сказаў, што яго краіна прызнае незалежнасць дзвюх дзяржаў «ад сёння», перадае «Інтэрфакс».
«Венесуэла далучаецца да прызнання незалежнасці рэспублік Абхазія і Паўднёвая Асеція», - заявіў лідэр Венесуэлы.
«Ад сёння мы прызнаем гэтыя дзве рэспублікі», – сказаў У.Чавес.
Венесуэла стала трэцяй краінай, якая прызнала незалежнасць Абхазіі і Паўднёвай Асеціі, пасля Расеі і Нікарагуа.
Нагадаем, што ў свой час Беларусь падтрымала вайсковыя дзеянні Расеі ў Паўднёвай Асеціі і Грузіі. Пазней Аляксандр Лукашэнка і службовыя асобы МЗС краіны неаднаразова намякалі, што ў хуткім часе Сухум і Цхінвал атрымаюць прызнанне з боку Менску.
Аднак дадзены працэс відавочна зацягваўся. Лукашэнка адсылаў тых, хто цікавіцца, да «парламента», а «парламент» - да Лукашэнкі, заўважаючы, што вырашаць такія пытанні не ў яго кампетэнцыі.
Эксперты выказваюць думку, што беларускі дыктатар будзе гуляць на супярэчаннях Расеі і ЕЗ і надалей, адцягваючы прызнанне рэспублік столькі, колькі магчыма, паралельна спрабуючы атрымаць прэферэнцыі ад абодвух бакоў.
