Апазіцыянера пераследуюць за распаўсюджванне інфармацыі пра вязня сумлення Дубскага

Лідскі актывіст «Маладога фронту» Вадзім Бароўскі атрымаў позву на паседжанне адміністрацыйнай камісіі па справе распаўсюджвання партрэтаў палітвязня Арцёма Дубскага.

Як паведамляе mfront.net, актывісту Вадзіму Бароўскаму трэба з'явіцца 26 жніўня ў 16:00 у кабінет №7 райвыканкама па вуліцы Савецкая 8. Позва падпісаная сакратаром камісіі Ю.Т. Ясюкайць. Варта адзначыць, што позва прыйшла ў паштовую скрыню і не была ўручаная пад распіску.

Нагадаем, што 27 ліпеня ў Лідзе ў раёне чыгуначнага вакзалу супрацоўнікі міліцыі затрымалі Вадзіма Бароўскага і Кастуся Ліцвінскага.

Моладзевыя актывісты расклейвалі інфармацыйныя ўлёткі пра палітвязня Арцёма Дубскага.

Супрацоўнікі праваахоўных органаў адвезлі актывістаў «Маладога фронту» у раённы аддзел міліцыі.

Адзначым, што 7 ліпеня ўдзельнік «Працэсу 14-ці» Арцём Дубскі быў прысуджаны да года пазбаўлення волі ў калоніі агульнага рэжыму за парушэнне правілаў адбыцця пакарання па «справе 14-ці». У 2008 годзе моладзевы актывіст быў вымушаны з'ехаць ва Украіну ў сувязі з тым, што супрацоўнікі міліцыі вынеслі яму два надуманыя папярэджанні аб парушэнні правілаў адбыцця пакарання. Дубскі быў затрыманы 13 лютага 2009 года ў Гомелі.

«Справа 14-ці» – справа па арт. 342 Крымінальнага кодэкса Рэспублікі Беларусь, узбуджаная ў дачыненні да ўдзельнікаў мірнай акцыі пратэсту прадпрымальнікаў, якая прайшла ў Менску 10 студзеня 2008 года.

За ўдзел у гэтай акцыі 14 моладзевых актывістаў былі прысуджаныя да розных тэрмінаў пазбаўлення і абмежавання волі. Міжнародная праваабарончая арганізацыя «Amnesty International» у 2009 годзе прызнала ўдзельнікаў «Працэсу 14-ці» Вязнямі сумлення.