Каля Дома ўраду разагналі акцыю з патрабаваннем амніставаць палітвязняў (Фота, відэа)

Актывісты грамадзянскай кампаніі «Еўрапейская Беларусь» патрабавалі амніставаць удзельнікаў «Працэсу 14-ці».

Акцыя каля Дома ўраду на плошчы Незалежнасці, дзе таксама засядае «палата прадстаўнікоў», была праведзеная ў сувязі з тым, што 15 красавіка беларускія «дэпутаты» збіраюцца прыняць на сесіі законапраект аб амністыі. Праект закона «Аб амністыі ў сувязі з 65-годдзем вызвалення Беларусі ад нямецка-фашысцкіх захопнікаў» быў занесены Аляксандрам Лукашэнкай.

Актывісты «Еўрапейскай Беларусі» сталі на плошчы Незалежнасці, трымаючы расцяжку «Амністыю ўдзельнікам «Працэсу 14-ці»!» і скандавалі «Амністыю!». Праз некалькі хвілін ахова Дома ўрада выклікала супрацоўнікаў міліцыі і апазіцыянераў павезлі ў Маскоўскі РУУС Менска.

Сярод затрыманых - Павел Юхневіч, Максім Вінярскі, Кацярына Сцепанюк, Алег Ладуцька, Улад Ігнатовіч, Марта Крылова, Паліна Дзьякова і Аляксей Ляўковіч.

Маладых апазіцыянераў пратрымалі ў аддзяленні міліцыі некалькі гадзін, а затым вызвалілі без складання пратаколаў.

Нагадаем, што «Справа 14-ці» - справа па арт. 342 Крымінальнага кодэкса Рэспублікі Беларусь, узбуджаная ў дачыненні да ўдзельнікаў мірнай акцыі пратэсту прадпрымальнікаў, якая прайшла ў Менску 10 студзеня 2008 года.

За ўдзел у гэтай акцыі моладзевы актывіст Андрэй Кім быў прысуджаны судом Цэнтральнага раёна Менска да 1,5 гадоў калоніі (вызвалены ў жніўні 2008 года). Актывіст грамадзянскай кампаніі «Еўрапейская Беларусь» Аляксандар Баразенка быў прысуджаны да абмежавання волі тэрмінам на 1 год без накіравання ў выпраўленчую ўстанову, з 27 кастрычніка да 9 снежня 2008 года да суду ён утрымліваўся ў СІЗА. Астатнія ўдзельнікі «Працэсу 14-ці» -- Арцём Дубскі, Аляксей Бондар, Міхаіл Крываў, Міхаіл Пашкевіч, Аляксандр Стральцоў, Аляксандр Чарнышоў, Тацяна Цішкевіч, Міхаіл Субач і Павал Вінаградаў прысуджаныя да абмежавання волі на 2 гады без накіравання для адбыцця пакарання ў спецыяльныя ўстановы. Максім Дашук, як непаўнагадовы, прысуджаны да паўтарох гадоў абмежавання волі

Варта адзначыць, што Арцём Дубскі нібыта за парушэнне правілаў адбывання пакарання вось ужо некалькі месяцаў знаходзіцца пад арыштам.