Сайт Хартыі падвергся DdoS-нападу

DdoS-напад на сайт charter97.org пачаўся ў 13-05 і працягваецца дагэтуль. Падобна, цэнзура ў інтэрнэце стала дзейнічаць яшчэ да прыняцця скандальнага законапраекта.

Зараз тэхпадтрымка здолела мінімізаваць наступствы нападу, і сайт даступны большасці наведвальнікаў.

Характэрна, што напад на сайт charter97.org быў здзейснены пасля з'яўлення ў інтэрнэце тэксту законапраекта «Аб мерах па ўдасканаленні выкарыстання нацыянальнага сегмента глабальнай кампутарнай сеткі інтэрнэт». У скандальным дакуменце ідзе гаворка пра блакаванне непажаданых уладам сайтаў, ідэнтыфікацыі карыстальнікаў Сеткі, прыцягненне да адказнасці распаўсюднікаў інфармацыі, а таксама дзяржрэгістрацыі інтэрнэт-СМІ.

У апошні час на сайце з'явіўся шэраг вострых матэрыялаў. Сёння было апублікавана інтэрв'ю з першым кіраўніком незалежнай Беларусі Станіславам Шушкевічам, які выказаў шэраг крытычных выказванняў у адрас Аляксандра Лукашэнкі. Раней на сайце было апублікавана расследаванне журналісткі Ірыны Халіп пра «брудныя» метады беларускага КДБ у барацьбе за спадчыну грузінскага алігарха Бадры Патаркацышвілі. Таксама варта адзначыць, што заўтра, у Дзень салідарнасці, у Менску адбудзецца акцыя пад лозунгам «Выкрадальнікаў людзей – у Гаагу!» з патрабаваннем правесці расследаванне апошніх выкраданняў моладзевых лідэраў Беларусі.