Кіраўнік МЗС Літвы: «ЕГУ павінен вярнуцца ў Менск»
9- 25.11.2009, 8:33
24 лістапада Вігаўдас Ушацкас сустрэўся са студэнтамі Еўрапейскага гуманітарнага ўніверсітэта ў Вільні.
«У ідэале ў будучыні Еўрапейскі гуманітарны ўніверсітэт павінен вярнуцца ў Менск — туды, дзе ён павінен быць», — заявіў на сустрэчы міністр замежных справаў Літвы.
Аднак Ушацкас прызнаў, што «у эгаістычных інтэрасах Літвы» было б захаваць ЕГУ у Вільні.
«Можна было б вярнуцца ў Менск у якасці факультэта літоўскага ЕГУ. Асабіста, з эгаізму, я б хацеў, каб сам ЕГУ застаўся тут», — адзначыў Ушацкас 24 лістапада падчас сустрэчы са студэнтамі ЕГУ, адказваючы на іх пытанні.
Пры гэтым кіраўнік літоўскай дыпламатыі адзначыў, што канчатковае рашэнне павінна прымацца супольнасцю гэтага вну.
Пакуль ЕГУ знаходзіцца ў Вільні, лічыць Ушацкас, ён бы мог стаць рэгіянальным адукацыйна-асветніцкім цэнтрам не толькі для беларусаў, але і для грамадзянаў Малдовы, Украіны, Грузіі, а таксама Расеі.
«Мы б хацелі як мага паўней выкарыстаць вашую прысутнасць тут», — сказаў літоўскі міністр. Ён заклікаў кіраўніцтва вну прымаць меры ў накірунку такога развіцця ЕГУ і прапанаваў дапамогу літоўскага ўрада.
Еўрапейскі гуманітарны ўніверсітэт працуе ў выгнанні ў Вільні пасля таго, як у 2004 годзе яго закрылі беларускія ўлады.
Дапамогу ЕГУ, акрамя Літвы, аказвае Еўрапейская камісія, шэраг фондаў краінаў Еўропы і ЗША. Зараз у вну навучаецца больш за тысячу студэнтаў, амаль усе яны грамадзяне Беларусі.
