Гэта будзе не перапіс, а складанне «дасье» на кожнага

З 14 па 21 кастрычніка ў Беларусі праводзіцца чарговы перапіс насельніцтва. Грамадзянам хочуць задаць 37 пытанняў.

Для перапісу распрацаваныя дзве анкеты. Адна з пытаннямі пра вашую асобу. Другая - з пытаннямі пра вашыя жыллёвыя ўмовы, паведамляе «Комсомольская правда в Беларуси».

Пытанні ў анкеце №1 (пра жыллёвыя ўмовы).

- Поўны адрас месца жыхарства.

- Характарыстыка месца жыхарства: тып памяшкання, перыяд пабудовы, матэрыял вонкавых сценаў, агульная плошча, усе віды добраўпарадкавання.

- Спіс чальцоў вашай сям'і.

- У чыёй уласнасці гэтае жылое памяшканне. Ну а калі ў чальцоў вашай сям'і ёсць сваё ўласнае іншае жылое памяшканне, дык і гэта таксама трэба пазначыць з усімі падрабязнасцямі.

- І апошняе пытанне ў гэтай форме, ці ёсць у вас кампутар і ці падлучаны ён да Інтэрнэту.

Пытанні ў анкеце №2 (асабіста пра вас)

- Прозвішча, імя, імя па бацку

- Дата і месца нараджэння

- Пол

- Кім вы прыходзіцеся гаспадару жылога памяшкання, у якім пражываеце?

- Грамадзянства

- Сямейнае становішча (варыянты: знаходжуся ў шлюбе, не знаходзіўся (лася) ніколі, разведзены (-ая), знаходжуся ў незарэгістраваных стасунках, разыйшоўся(лася).

- Ці бесперапынна пражываеце ў гэтым паселішчы з нараджэння?

- Пражывалі вы бесперапынна больш за год у іншай краіне?

- З якой краіны прыбылі, па якой прычыне?

- Узровень вашай адукацыі і ці вучыцеся вы?

- На якой мове звычайна размаўляеце дома і якой замежнай мовай свабодна валодаеце?

- Месца працы. Кім, дзе, від дзейнасці, пасада?

- Крыніца сродкаў на існаванне - праца, стыпендыя, пенсія, дапамога, дывідэнды, адсоткі. А вось калі некалькі, дык неабходна пазначыць адзін асноўны.

- Ці шукалі вы працу за месяц да перапісу? Дык трэба пазначыць адну прычыну пошуку.

- Ці працавалі вы ў апошні тыдзень перад перапісам?

Ёсць пытанні, якія зададзеныя з удакладненнямі:

- Ваша родная мова (мова, засвоеная першай у раннім дзяцінстве)?

- Да пытання, да якой нацыянальнасці вы сябе адносіце, ёсць дадатак (па самавызначэнні і жаданні рэспандэнта).

- Колькі дзяцей вы нарадзілі? (Пытанне для жанчынаў старэйшых за 15-ць гадоў).