Улады зноў забаранілі мітынг супраць будаўніцтва АЭС
7- 5.01.2009, 9:55
Смаргоньскія ўлады не дазволілі правесці пікет супраць будаўніцтва АЭС у Астравецкім раёне.
У адказе чыноўнікі спасылаюцца на тое, што пакуль не падпісаны ўказ Аляксандра Лукашэнкі аб будаўніцтве АЭС менавіта ў Астравецкім раёне, паведамляе «Радыё Свабода».
Смаргоньскія актывісты планавалі правядзенне пікету «Астравецкая АЭС - пагроза смаргонцам» 11 студзеня. Аднак адзін з яго заяўнікаў атрымаў адказ мясцовых чыноўнікаў, у якім зазначаецца, што пакуль толькі дзяржаўная камісія па выбары месца размяшчэння зямельнага надзелу для будаўніцтва станцыі падпісала акт аб будаўніцтве АЭС менавіта ў Астравецкім раёне.
Аднак без подпісу беларускага кіраўніка такое рашэнне нельга лічыць канчатковым. Таму мясцовыя чыноўнікі палічылі пікет супраць будаўніцтва АЭС немэтазгодным.
