Стадыён «Дынама» спрабуюць ачысціць ад снега да матчу БАТЭ – «Рэал» (Фота)

Напярэдадні прыезду інспектара УЕФА супрацоўнікі галоўнай арэны краіны і вайскоўцы спрабуюць ачысціць ад снега трыбуны і футбольнае поле.

Сіноптыкі прагназуюць снег і на заўтра, на дзень матчу Лігі чэмпіёнаў. Аднак дырэктар стадыёна "Дынама" Уладзімір Вільчынскі не хоча верыць гэтым прагнозам.

"Я адмаўляюся верыць гэтым сіноптыкамі, таму што яны кажуць, што снега не будзе, а снег ідзе. Сёння і заўтра - снег. А як там будзе на самой справе, цяжка сказаць", -- сказаў ён у інтэрв'ю «Еўрарадыё».

Зараз чысціць ад снега трыбуны актыўна дапамагаюць вайскоўцы, таму Вільчынскі з аптымізмам кажа, што да пачатку матчу ўсё будзе падрыхтавана належным чынам:

"Падрыхтоўка ідзе паспяхова, дапамагаюць нам вайскоўцы. Мабілізавалі ўсіх сваіх супрацоўнікаў, таму стадыён будзе падрыхтаваны", -- сцвярджае дырэктар стадыёна.

Ужо сёння ўвечары у Менск прыедзе інспектар УЕФА, які павінен сказаць, ці гатовы стадыён "Дынама" правесці матч БАТЭ - "Рэал".

Фота -- malishevsky.livejournal.com