Рада Еўропы прытрымліваецца 12 прапаноў Еўразвяза ў развіцці стасункаў з Беларуссю

Рада Еўропы падзяляе пазіцыю Еўрапейскага Звязу па выкананні Беларуссю 12 умоў, неабходных для развіцця двухбаковых стасункаў, заявіў журналістам у Менску дакладчык ПАРЕ па сітуацыі ў Беларусі, намеснік старшыні Асамблеі Андрэа Рыгоні. "Мэтай нашага візіту з'яўляецца вывучэнне таго, як выконваецца праграма па выкананні 12 пунктаў Еўрапейскага Звязу. У гэтым сэнсе мы выказалі сваё меркаванне, меркаванне Рады Еўропы", – адзначыў А.Рыгоні.

Ён сказаў, "што супрацоўніцтва прадугледжвае пэўныя крокі, якія неабходна рабіць разам". "Маё наведванне Беларусі звязанае з тым, каб падаць справаздачу аб выкананні гэтых 12 пунктаў і даць аб'ектыўную карціну таго, што адбываецца ў Беларусі", – заявіў дакладчык ПАРЕ. А.Рыгоні ўдакладніў, што яго цікавяць пытанні "станы дэмакратыі, захавання правоў чалавека, развіццё супрацоўніцтва паміж уладай і ўсімі дэмакратычнымі інстытутамі".

Нагадаем, што 14 кастрычніка ў Менску з ініцыятывы грамадзянскай супольнасці прайшоў Еўрапейскі Марш, мэтай якога была дэманстрацыя еўрапейскага выбару беларусаў і заклік да ўлад прыняць 12 прапаноў Еўразвяза. Ініцыятыву правядзення Еўрапейскага Марша ў Менску вітала кіраўніцтва Еўрапейскага Звязу.

Пасля акцыі арганізатары Еўрапейскага Марша заявілі, што дэмакратычныя сілы Беларусі будуць праводзіць кампанію «Еўрапейскі Марш» датуль, пакуль улады не прымуць 12 прапаноў Еўразвяза.