Дзяржавіякампанія спрабуе прадаць самалёт без рухавікоў
4- 16.07.2024, 18:42
- 5,550
![Дзяржавіякампанія спрабуе прадаць самалёт без рухавікоў](https://i.c97.org/ai/603103/aux-head-1721144535-20240101_skriin_360.jpg)
Год таму яго не набылі з коштам, амаль у два разы ніжэйшым.
Дзяржаўная авіякампанія «Трансавіяэкспарт» выставіла на продаж 36-гадовы грузавы самалёт, вынікае з аб'явы на сайце Інстытута нерухомасці і ацэнкі. Кошт у 1,8 разы вышэйшы за той, за які яго спрабавалі прадаць год таму.
Аўкцыён у продажы самалёта ІЛ-76МД EW-78769 з серыйным нумарам 6602 стартуе з 1,5 млн даляраў (гэта амаль 4,8 млн рублёў паводле курсу Нацбанка на 16 ліпеня) без уліку падатку на даданую вартасць. Пройдзе аўкцыён 24 ліпеня.
Прадае грузавы самалёт 1988 года выпуску дзяржаўная авіякампанія «Трансавіяэкспарт». Пакупніку авіятранспарт дастанецца без рухавікоў, дапаможных сілавых установак і абсталявання спецыяльнага прызначэння.
Роўна год таму гэтая ж кампанія спрабавала прадаць самалёт з коштам амаль у 1,8 разы ніжэйшым – 840 тысячаў даляраў. Тады ж яна рэалізавала аналагічнае паветранае судна, выпушчанае на паўгода пазней за выстаўленае на аўкцыён цяпер. Аднак і ў гэтым выпадку кошт, з якога стартаваў гандаль, быў больш сціплы – 870 тыс. даляраў (цяпер гэта 2,78 млн рублёў).