У ЕЗ растлумачылі, чаго хочуць дабіцца пакараннем Вугоршчыны праз візіт Орбана
- 16.07.2024, 16:21
- 5,964
![У ЕЗ растлумачылі, чаго хочуць дабіцца пакараннем Вугоршчыны праз візіт Орбана](https://i.c97.org/ai/601233/aux-head-1719908671-20240702_orban_360.jpg)
Еўракамісія імкнецца паслаць два сігналы.
Еўрапейская камісія надумала знізіць узровень прадстаўніцтва на нефармальных пасяджэннях Рады ЕЗ падчас вугорскага старшынства, каб паказаць незадаволенасць няўзгодненымі замежнапалітычнымі крокамі Віктара Орбана.
Пра гэта на брыфінгу ў аўторак, 16 ліпеня, сказаў прадстаўнік Еўракамісіі Стэфан дэ Кеерсмакер, паведамляе «Еўрапейская праўда».
Са слоў дэ Кеерсмакера, сваім дэмаршам Еўракамісія імкнецца паслаць два сігналы. Мэта першага - падкрэсліць, што мы «застаёмся цалкам адданымі канструктыўнаму супрацоўніцтву з усімі інстытутамі Еўрапейскага Звязу і з дзяржавамі-чальцамі».
«Гэта сапраўды так. Гэта адна з прычын, чаму, напрыклад, Камісія будзе прадстаўленая на палітычным узроўні на афіцыйных пасяджэннях Рады», - дадаў ён.
У той жа час, дадаў прадстаўнік Еўракамісіі, яна хоча выказаць «неўхваленне няўзгодненымі паездкамі прэм'ер-міністра Орбана ў трэція краіны з пытаннямі вайны ва Украіне, якія сапраўды пашкодзілі незаменнаму іміджу адзінства з Еўрапейскім Звязам".
«І на знак нязгоды быў зроблены гэты сімвалічны жэст», – падсумаваў дэ Кеерсмакер.
Напярэдадні з прычыны «мірных ваяжоў» Віктара Орбана кіраўніца Еўракамісіі Уршуля фон дэр Ляен скасавала візіт калегіі камісараў у Вугоршчыну і адкарэктавала ўзровень прадстаўніцтва на пасяджэннях пад вугорскім старшынствам.