Настаўнікі патрабуюць ад міністра-камуніста паказаць дэкларацыю аб даходах

Яны хочуць звярнуць увагу на істотнае зніжэнне заробкаў.

На petitions.by з'явіўся зварот з патрабаваннем да міністра адукацыі Ігара Карпенка паказаць дэкларацыю аб даходах, паведамляе belsat.eu.

Аўтары петыцыі звяртаюць увагу на тое, што заробкі педагогаў цяпер налічваюцца згодна з новай сістэмай разліку. Педагогі скардзяцца на істотнае зніжэнне заробкаў.

«З увядзеннем новай методыкі аплаты працы бюджэтнікам, настаўнікі сталі атрымліваць не толькі паведамленні, у якіх сказана, што іх службовы аклад складае 290,45 рубля (Гл. Фота), але і меншы заробак. Каб развеяць сумневы ў тым, што гэта заробак, які нельга назваць годным, мы хочам, каб міністр адукацыі апублікаваў сваю дэкларацыю аб даходах. Каб паказаў, што ён - адзін з нас: настаўнік. Што ён атрымлівае суразмернае з настаўніцкім узнагароджанне за сваю працу», - гаворыцца ў петыцыі.

Летась старшыня Сталай камісіі ў бюджэце і фінансах Палаты Прадстаўнікоў Людміла Дабрыніна паведаміла, што праект бюджэту на 2020 год прадугледжвае рост заробкаў работнікаў бюджэтнай сферы на 10-11%.