Археолагі знайшлі загадкавую выяву старажытнай багіні

Статуэтка адрозніваецца ад усіх вядомых навуцы.

Гліняная фігурка жанчыны ўзростам 6600 гадоў знойдзеная археолагамі ў Баўгарыі побач з чарнаморскім узбярэжжам, паведамляе 16 верасня Archaeology Magazine.

Знаходка зробленая ў паўночна-ўсходняй частцы краіны, каля горада Суворава ў Варненской вобласці. Фігурка, якая паказвае цяжарную жанчыну, датаваная 4700-4600 г. да н. э. - сярэднім халкалітам.

Статуэткі, якія належаць да гэтага перыяду, вельмі рэдкія, адзначае археолаг Уладзімір Слаўчаў з Варненскага археалагічнага музея ў жывым эфіры «Радыё Варна». Знаходка характэрная сваёй незвычайнасцю, яна не падобная на тыповыя жаночыя антрапаморфныя выявы, знойдзеныя раней.

«Вельмі мала чалавечых фігурак было знойдзена на чарнаморскім узбярэжжы (Баўгарыі - заўв. ІА Чырвоная Вясна) з сярэдняга халкаліту. Гэта дзіўная з'ява, улічваючы, што антрапаморфныя выявы былі часткай паўсядзённага жыцця старажытных людзей. Яны пачалі масава з'яўляцца з пачатку ранняга неаліту і былі шырока распаўсюджаныя аж да канца позняга халкаліту. Хутчэй за ўсё, гэта было звязана з культавымі, рытуальнымі, рэлігійнымі вераваннямі. Мяркуецца, што гэтыя фігуркі малююць жрыц пэўных божастваў або саму Багіню-Маці - вярхоўнае бажаство ў пантэоне дагістарычных людзей», - дадае Слаўчаў.

Ад фігуркі захавалася толькі палова - 15 см, першапачаткова ж у ёй было 30 см. У яе няма рук, ног і галавы, толькі тулава. Ніжняя частка пакуль не знойдзеная, але адмыслоўцы мяркуюць, што ў статуэткі быў вялікі жывот.

Акрамя гэтай фігуркі, у гэтым месцы ў 2019 годзе была знойдзеная яшчэ адна цяжарная «Венера», якая выглядае стандартна для такіх малюнкаў.

«З ранняга і позняга халкаліту такіх фігурак шмат. Аднак у сярэднім халкаліце яны сустракаюцца вельмі і вельмі рэдка. Каб вы маглі атрымаць уяўленне, вазьміце знаходкі з гарадзішча на востраве ў возеры Дуранкулак (размешчанага на паўночным усходзе Баўгарыі - проста ля ўзбярэжжа Чорнага мора - заўвага рэдактара - заўв. ІА Чырвоная Вясна). Там антрапаморфныя статуэткі з сярэдняга халкаліту складаюць менш за 5% ад аналагічных знаходак позняга халкаліту. Усяго я ведаю блізу 15 такіх статуэтак з сярэдняга халкаліту з усяго Чарнаморскага ўзбярэжжа (Баўгарыі). А з позняга халкаліту іх некалькі сотняў», - адзначае археолаг.

Ён таксама мяркуе, што халкалітычны перыяд быў вельмі важны для развіцця дагістарычнага чалавека.

«Гэта быў вельмі кароткі перыяд, цягам якога працэсы інтэграцыі, развіцця халкалітавага грамадства былі надзвычай бурнымі ў гэтым рэгіёне. Гэта быў акурат той перыяд, калі былі створаныя ўсе перадумовы для выдатнага развіцця рэгіёну, як гэта было пазней асвечанае культурай Варны. Фактычна падчас позняга халкаліту жылі носьбіты культуры хамангіі - давайце згадаем правільную археалагічную тэрміналогію, папярэднікаў культуры Варны. Усё, што яны заклалі для развіцця сацыяльнай структуры і эканамічных дачыненняў на больш познім этапе, было распрацаванае носьбітамі культуры Варны падчас позняга халкаліту», - дадае супрацоўнік археалагічнага музея Варны.

Шанцы знайсці другую палову фігуркі вельмі малыя, але археолагі спадзяюцца на лепшае. «Нават пры такім выглядзе фігурка досыць прадстаўнічая, каб стаць часткай нашых выстаў», - мяркуе Слаўчаў.