У Клецкім раёне заўважылі незвычайнага чорнага бусла
- 26.04.2026, 13:30
- 1,530
Птушка шукае сяброў.
У Клецкім раёне жыве рэдкі жыхар — чорны бусел. Ён доўгі час спрабуе пасябраваць з белымі суродзічамі, але пакуль безвынікова, піша Smartpress.
Звычайна чорныя буслы трымаюцца падалей ад людзей і пасяляюцца ў лясах на буйных дубах, асінах або саснах з тоўстымі галінамі. Але менавіта гэта птушка чамусьці на працягу шасці гадоў кожную вясну вярталася ў Секерычы і праводзіла ўсё лета побач з гняздом белых буслоў. Чырванакніжны самец з года ў год заставаўся без пары і нават часам атрымліваў адпор ад белых суродзічаў за свае спробы зблізіцца з імі.
Мясцовыя жыхары гадалі, ці вернецца незвычайны крылаты сусед у аграгарадок гэтай вясной, ці ўсё ж перасяліцца ў лес, знойдзе сабе пару і зажыве шчасліва. І вось з'явіўся адказ.
— Ён прыляцеў у Секерычы 14 красавіка і заняў свой «вартаўнічы» слуп каля тады яшчэ пустога гнязда белых буслоў, — распавёў біёлаг Сяргей Шокала. — Перыядычна птушка падлятала і засяроджана стаяла ў гэтым гняздзе. Разам са сваімі белымі суродзічамі кармілася на свежаўзараных участках сельскагаспадарчых угоддзяў аграгарадка.
Тым часам белыя буслы заняліся працягам роду, і цяпер чырванакніжнік цярпліва восседае каля гнязда з птушкай, якая насяджае яйкі.
Чаму ён так прывязаны да роднаснага, але ўсё ж не свайго віду, ніхто не ведае. Людзі працягваюць спадзявацца, што крылаты знойдзе сваё птушынае шчасце і сустрэне падыходную самку.
Нагадаем, чорны бусел быў абраны Птушкай 2026 года ў Беларусі. Гэта рэдкі від, колькасць якога ў нашай краіне ацэньваецца ў 900—1300 пар. З-за высечкі старых лясоў застаецца ўсё менш месцаў, дзе птушкі могуць будаваць сабе гнёзды.
Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe
Звязацца з намі можна праз адрас [email protected]
