Расійскім ВНУ ўстанавілі квоту на адпраўку студэнтаў на вайну

Задачу перад рэктарамі паставіў міністр навукі і вышэйшай адукацыі РФ.

Расійскія ўлады запатрабавалі ад найбуйнейшых ВНУ краіны накіраваць на вайну не менш за 2% ад колькасці студэнтаў. Адпаведную задачу перад рэктарамі навучальных устаноў на пачатку 2026 года паставіў міністр навукі і вышэйшай адукацыі РФ Валерый Фалькоў, паведамілі Faridaily добра інфармаваныя крыніцы.

Згодна з данымі за 2025 год, у расійскіх ВНУ вучыліся 2,2 млн мужчын. У выпадку выканання навучальнымі ўстановамі патрабаванняў уладаў кантракты з Мінабароны заключаць 44 тыс. чалавек. Калі такі ж план стаіць перад тэхнікумамі, то гэтая лічба павялічыцца да 76 тыс., адзначае Faridaily.

Адміністрацыі ВНУ і тэхнікумаў па ўсёй Расіі з канца мінулага года сталі настойліва прапаноўваць студэнтам узяць акадэмічны адпачынак і заключыць кантракт з Мінабароны. Студэнтаў завабліваюць асобнымі даплатамі і запалохваюць адмовай у пераздачы «хвастоў». У асноўным студэнтаў вербуюць у войскі беспілотных сістэм (ВБС). Паводле даных «Важных гісторый», ваеннае ведамства да канца 2026 года плануе набраць у новы род войскаў 78,8 тыс. чалавек. У дакументах, з якімі азнаёмілася выданне, гаварылася, што 58 тыс. чалавек павінны быць набраныя са студэнтаў, выпускнікоў курсаў па кіраванні БПЛА, былых вайскоўцаў авіяцыйных частак і «грамадзянак жаночага полу» з адпаведнай падрыхтоўкай. Астатніх 20,8 тыс. вайскоўцаў плануецца набраць перакладам на кантракт салдат тэрміновай службы і дзеючых ваенных з іншых падраздзяленняў.

Пры гэтым вербаванне расіян у ВБС забуксавала, пісалі правайсковыя блогеры. На дадзены момант у рэгіёнах, якія ўжо «прапыласосілі вербоўкай», на вайну запісваецца толькі «даволі спецыфічны кантынгент, найменш прыдатны да таго, каб стаць касцяком новага высокатэхналагічнага роду войскаў», адзначаў Z-блогер Аляксей Чадаеў. Паводле яго слоў, патэнцыйна перспектыўныя грамадзяне адмаўляюцца ад кантракта, баючыся пераводу ў штурмавую пяхоту і бестэрміновай службы.

Да гэтага юрыст Арцём Клыга звярнуў увагу, што прапанаваныя Мінабароны кантракты на праходжанне службы ў ВБС прадугледжваюць накіраванне людзей у пяхоту ў выпадку, калі іх прызнаюць непрыдатнымі да кіравання беспілотнікамі. Акрамя таго, такія кантракты будуць дзейнічаць да завяршэння мабілізацыі ў Расіі, указ аб якой Уладзімір Пуцін дагэтуль не падпісаў.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]