У Расіі асуджаны на 13 гадоў намеснік Шайгу вырашыў «здаць» іншых чыноўнікаў

Цімур Іваноў прапанаваў заключыць досудовае пагадненне аб супрацоўніцтве.

Былы намеснік міністра абароны РФ і бліжэйшы паплечнік Сяргея Шайгу Цімур Іваноў, прысуджаны да 13 гадоў за карупцыю, прапанаваў заключыць досудовае пагадненне аб супрацоўніцтве, паабяцаўшы даць паказанні на іншых чыноўнікаў. Як стала вядома «Коммерсантъ», адпаведнае клопатанне Іваноў падаў раніцай 27 сакавіка ў СІЗА «Лефортава» пасля заканчэння азнаямлення з 458 тамамі сваёй другой крымінальнай справы — аб атрыманні хабароў на агульную суму больш за 1,3 млрд рублёў, легалізацыі злачынных даходаў і незаконным захоўванні зброі.

У клопатаннi на імя кіраўніка следчай групы СКР Сяргея Каравіна Іваноў выказаў гатоўнасць паведаміць пра супрацьпраўную дзейнасць шэрагу чыноўнікаў, а таксама пра іх маёмасць, што, на яго думку, дазволіць звярнуць у даход дзяржавы маёмасць на мільярды рублёў. Пры гэтым былы намеснік Шайгу адзначыў, што гатовы супрацоўнічаць толькі «у выпадку аб'ектыўнай ацэнкі здзейсненага ім». Іваноў адмаўляе атрыманне хабароў, але прызнае, што злоўжываў службовым становішчам.

Як піша «Коммерсантъ», у сваім звароце Іваноў распавёў пра ўзаемаадносіны з іншым фігурантам справы — саўзаснавальнікам кампаніі «Олимпситистрой» Аляксандрам Фаміным, які прызнаў віну. Паводле версіі следства, менавіта ад Фаміна Іваноў у 2018–2023 гадах атрымаў хабар не менш за 1,185 млрд рублёў у выглядзе работ і будаўнічых матэрыялаў. Узамен, лічыць следства, ваеннае ведамства заключыла з кампаніямі Фаміна шматмільярдныя кантракты.

Яшчэ адзін эпізод звязаны з атрыманнем хабару ў 152 млн рублёў у выглядзе безвяртальнага крэдыту агракамплексу «Русское село», саўзаснавальнікам якога быў Сяргей Барадзін — давераная асоба Іванова. Трэці эпізод тычыцца бязвыплатнага будаўніцтва лазні з катэльняй коштам 56 млн рублёў каля дома былой жонкі Іванова Святланы Захаравай на Рублёва-Успенскай шашы. Акрамя таго, Іванову інкрымінуюць незаконнае захоўванне і выраб зброі — у яго знайшлі незарэгістраваную копію рэвальвера Colt узору 1851 года і два пераробленыя ў абрэз паляўнічыя карабіны.

Сам Іваноў настойвае, што яго дзеянні варта кваліфікаваць як злоўжыванне службовымі паўнамоцтвамі (арт. 285 КК РФ), паколькі ён незаконна працягнуў займацца бізнесам, стаўшы чыноўнікам. Паводле яго слоў, у 2014 годзе, калі ён яшчэ не быў намеснікам міністра, а ўзначальваў «Галоўнае ўпраўленне добраўпарадкавання войскаў» і «Абаронстрой», ён разам з Фаміным стварыў сумеснае прадпрыемства на базе «Олимпситистрой». Іваноў адказваў за атрыманне кантрактаў і зносіны з чыноўнікамі, Фамін — за будаўніцтва, даходы яны дзялілі 50 на 50. У выніку, сцвярджае абвінавачаны, «Олимпситистрой» з невялікай кампаніі ператварыўся ў падрадчыка з кантрактамі на 140 млрд рублёў.

Адвакат Іванова Мурад Мусаеў не пацвердзіў і не абверг інфармацыю пра клопатанне, але заявіў, што расследаванне справы яго падабароннага нельга назваць аб'ектыўным і эфектыўным. «Відавочна, дзейнасць следчай групы была накіравана на тое, каб паглыбей закапаць Цімура Іванова, а ніколькі не на ўстанаўленне ісціны», — сказаў абаронца.

У ліпені 2025 года Масгарсуд прысудзіў Іванова да 13 гадоў калоніі па першай справе — аб растраце пры закупцы паромаў для Крымскай пераправы і вывадзе больш як 3,9 млрд рублёў з банка «Интеркоммерц». Знаходзячыся пад вартай, былы намеснік міністра абароны неаднаразова прасіўся на вайну супраць Украіны, але яму адмовілі.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]