Археолагі знайшлі скульптуру, якая можа перапісаць гісторыю адкрыцця Амерыкі

Магчыма, рымляне прыбылі на гэты мацярок за тысячу гадоў да Хрыстафора Калумба.

Археолагі выявілі ў грабніцы ў Мексіцы рымскі артэфакт узростам 2000 гадоў, які можа перавярнуць сучаснае ўяўленне пра гісторыю адкрыцця Амерыкі, уздымаючы пытанне пра магчымасць таго, што рымляне прыбылі на гэты мацярок за тысячу гадоў да Хрыстафора Калумба, піша The New York Post.

Тэракотавая скульптура барадатага мужчыны, якая атрымала назву «Галова Тэкасік-Калікстлахуака», была эксгумаваная мексіканскім археолагам Хасэ Гарсія Пайонам у 1933 годзе з аднайменнага сховішча паблізу ад Мехіка.

Фігура была пахаваная ў запячатанай грабніцы разам з аскепкамі керамікі, залатымі ўпрыгожваннямі, касцянымі артэфактамі і кавалкамі горнага крышталю. Пры гэтым, хоць гэтыя матэрыялы былі тыповыя для таго часу і рэгіёну, галава была зусім іншай і мела рысы, што больш нагадвалі старажытнае Міжземнамор’е, чым Мезаамерыку.

У 1961 годзе аўстрыйскі антраполаг Роберт Хайне-Гельдэрн выказаў здагадку, што артэфакт можа датыравацца 200 годам да нашай эры. Затым, у 1990 годзе, нямецкі археолаг Бернард Андрэа выказаў меркаванне, што бюст «без сумнення, рымскі», сцвярджаючы, што яго прычоска і форма барады нагадваюць прычоску і бараду імператараў дынастыі Севераў (193–235 гг. да н.э.).

І нарэшце, з дапамогай тэрмалюмінесцэнтнага датавання — награвання аб’екта і вымярэння выпраменьванага ім святла, назапашанага за пэўны перыяд часу, — даследчыкі змаглі вызначыць, што рэліквія датуецца перыядам паміж IX стагоддзем да н.э. і XIII стагоддзем н.э., задоўга да высадкі Калумба ў Амерыцы ў 1492 годзе. Тым часам само пахаванне датуецца перыядам паміж 1476 і 1510 гадамі нашай эры, да прыбыцця іспанскага канкістадора Эрнана Картэса у Мексіку ў 1519 годзе.

Некаторыя даследчыкі сцвярджалі, што галава трапіла туды на ранніх этапах еўрапейскіх даследаванняў, магчыма, нават падчас іспанскага заваявання Мексікі.

Іншыя сцвярджаюць, што аб’ект быў завезены выпадкова ў выніку старажытнага трансакіянскага дрэйфу. Яны вылучылі тэорыю, што рымскі, фінікійскі або берберскі карабель мог быць перанесены плынямі праз Атлантыку, пасля чаго дасягнуў берагоў Амерыкі, што падштурхнула мясцовых жыхароў падняць тэракотавую галаву і перанесці яе ўглыб краіны.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]