«А 3.05 разбудзіў дрон»: падрабязнасці пра выбух у Літве каля мяжы з Беларуссю

Гук чулі і ў Беларусі.

Уначы на 23 сакавіка у Літве недалёка ад мяжы з Беларуссю адбыўся выбух. Вайскоўцы мяркуюць, што гэта быў дрон, які мог прыляцець з нашай краіны. Падрабязнасці прыводзіць выданне Delfi.

Можна меркаваць, што ў Варэнскім раёне, каля вёскі Лавісас, мінулай ноччу мяжу Літвы перасёк і выбухнуў беспілотнік, сказаў прадстаўнік літоўскай арміі, Гінтаўтас Цюніс.

«Што гэта за аб’ект, пакажа расследаванне <�…>, але, відавочна, мы можам сказаць, што знойдзены рухавік унутранага згарання. Такія рухавікі выкарыстоўваюць у некаторых дронах <�…>. Можна меркаваць, што гэта быў дрон», — паведаміў Цюніс.

Паводле слоў прадстаўніка арміі, відавочцы паведамлялі пра дзірку на лёдзе возера Лавісас і абломкі, што валяліся вакол. Мясцовы жыхар распавёў, што каля трох гадзін ночы пачуў выбух. А да гэтага — гук дрона, які ляцеў. Ён пацвердзіў, што частку абломкаў знайшлі, іншыя шукаюць — збіраюць доказы, якія перададуць следчым. Сярод знаходак — рухавік унутранага згарання, які выкарыстоўваецца на дронах.

«Адкуль аб’ект мог прыляцець, пакуль не ведаем. Вядома, мы знаходзімся побач з Беларуссю. Расследаванне яшчэ не правялі, але гэта найбольш імавернае меркаванне. Вядома, з гэтай краіны», — зазначыў Цюніс.

Ён адзначыў, што радары літоўскай арміі след аб’екта не заўважылі. Яго не чулі і памежнікі. Пакуль на месцы выбуху не знайшлі выбухоўкі.

Расповед мясцовага жыхара — уначы разбудзіў гук «Шахеда»

Паводле слоў Вітаўтаса Лебеднікаса, уладальніка сядзібы ў вёсцы Жюрай прыкладна ў трох кіламетрах ад месца здарэння, уначы яго разбудзіў гук, падобны да жужжання беспілотніка тыпу Shahed.

«А 3.05 разбудзіў дрон, ён праляцеў вельмі нізка над сядзібай <�…>. Прыкладна праз пятнаццаць секунд — магутны выбух. Такі гучны, што аж вокны затрымцелі. Я выйшаў паглядзець: нічога, цішыня», — распавёў мужчына радыёстанцыі LRT.

«Раніцай я паехаў паглядзець у адзін і ў другі бок, дзе б ён мог быць. Я прыехаў [у месца] у трох кіламетрах ад месца здарэння, недалёка ад вёскі Лавісас, на беразе возера, і бачу, што там ужо стаяць паліцыя і выратавальная служба», — сказаў ён.

Мужчына таксама дадаў, што яму ўдалося запісаць выбух на свой тэлефон, але пра інцыдэнт ён паведаміў службам толькі раніцай:

«Ніхто не тэлефанаваў. Магчыма, чалавек трыццаць гэта чулі. Не ведаю, незвычайная рэч».

Дрон чулі і ў Беларусі

Нагадаем, уначы на 23 сакавіка ў розных кутках краіны беларусы чулі «жужанне», падобнае да гулу беспілотніка. Абмеркаванні гэтага з’явіліся ў Threads, піша «Зеркало».

Жужанне дрона згадвалася і ў пастах пра Гродна. Згаданы Варэнскі раён Літвы якраз мяжуе з Гродзеншчынай. Возера Лавісас знаходзіцца прыблізна за 20 км ад беларускай мяжы і за 60 км ад беларускага абласнога цэнтра.

Заўважым, у Threads пісалі, што ў Гродне каля 3.30 чулі дзіўны гук. У Літве відавочца казаў пра 3.05 па мясцовым часе (літоўскі час — гэта мінус гадзіна ад мінскага) — то бок прыкладна праз паўгадзіны. Круізная хуткасць дрона тыпу «Шахед» — каля 150–170 км/г.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]