«Ракеты «паветра-паветра» ў Саках паляцелі ў паветра, разам з бартамі»
3- 26.07.2024, 11:23
- 12,300
![«Ракеты «паветра-паветра» ў Саках паляцелі ў паветра, разам з бартамі»](https://i.c97.org/ai/556884/aux-head-1690049985-20230722_atacms_360.jpg)
Па расейскай авіябазе ўдарылі чатырма ракетамі ATACMS.
У ноч на 26 ліпеня Узброеныя сілы Украіны (УСУ) нанеслі ракетны ўдар па расейскім аэрадроме Сакі ў акупаваным Крыме, паведамляюць тэлеграм-каналы ASTRA і «Крымскі вецер».
Усяго, са звестак крыніцы Astra, у бок ваеннага аб'екта было выпушчана чатыры ракеты ATACMS, дзве з якіх былі збітыя сродкамі супрацьпаветранай абароны (СПА). Адна з ракет патрапіла па складзе боепрыпасаў, у выніку чаго адбыўся выбух і пачаўся пажар. Двое вайскоўцаў атрымалі асколачныя раненні.
«Ракеты «паветра-паветра» ў Саках паляцелі ў паветра. Разам з бартамі», - сцвярджае крыніца «Крымскага ветру».
Другая ракета, са звестак Astra, пашкодзіла месца дыслакацыі расейскай СПА за 5 км ад вёскі Шаўкавічная ў Сакскім раёне. Была знішчаная ўстаноўка радыёлакацыйнай станцыі.
Мінабароны РФ ніяк не каментавала атаку на вайсковую базу. Аднак уночы ў Севастопалі абвясцілі пагрозу балістычных ракет, а на Крымскім мосце перакрывалі рух аўтамабіляў. Сігнал пагрозы дзейнічаў шэсць хвілін - з 2:42 да 2:48 (па Менску).
Апошні раз УСУ білі ракетамі ATACMS па расейскім аэрадроме ў Крыме ў сярэдзіне траўня. Тады двойчы за дзень атакі зазналі размешчаны пад Севастопалем аэрадром Бельбек, на якім базуецца 38-ы знішчальны авіяцыйны полк 4-й гвардзейскай арміі СПА.