Дзе беларусам часцей выдаюць шэнгенскую візу
10- 25.07.2024, 19:41
- 14,636
![Дзе беларусам часцей выдаюць шэнгенскую візу](https://i.c97.org/p/articles/ai-154408-aux-head-shengen_visa_360.jpeg)
Усе варыянты.
Для беларусаў, якія захацелі атрымаць шэнгенскую візу, 2024 год стаў складаным годам. Многія ўсё яшчэ знаходзяцца ў нясцерпным чаканні, камусьці ўжо далі адмову.
Як адзначае Рэспубліканскі саюз турыстычнай індустрыі, назіраецца рост попыту на «шэнген» і павелічэнне тэрмінаў адкрыцця віз. Улетку яшчэ паспеюць з'ездзіць у Еўропу толькі вандроўцы з дзейным пропускам.
А калі візы няма, то даты заездаў ад тураператараў стартуюць з верасня-кастрычніка. «Точка» распавядае, якія зараз ёсць нюансы атрымання «шэнгена».
Вугорская віза
Вугорцы могуць падаць добрую візу - на тэрмін ад года да трох. Але толькі ў тым выпадку, калі вы ўжо былі ў жаданай краіне. Калі віза гішпанская, пакажыце ў пашпарце штампы гішпанскіх аэрапортаў або квіткі на самалёт у Гішпанію, рахунак-фактуру з гішпанскага гатэля.
Пры тым ёсць імавернасць яе адкрыцця і на некалькі дзён - як пашанцуе.
Кошт рашэння пад ключ - Br800-900, калі набываць тур з візавай падтрымкай, то гэта каштавацьме Br1600 (напрыклад, пяць дзён па Аўстрыі і Вугоршчыне).
Грэцкая віза
Грэцыя больш аператыўна афармляе шэнгенскую візу, але выключна пад даты тура. Хаця і тут, нават у летні сезон, бываюць адмовы 15-20%.
Зрэшты, калі ў іншых пасольствах ажыятаж, менавіта грэцкімі візамі некаторыя фірмы выбаўляюць вандроўцаў, якія заплацілі за туры ў Гішпанію і Італію. Для атрымання спатрэбіцца пацвярджэнне рэзервавання, транспарту.
Паслугі агенцтва ў гэтым выпадку пацягнуць на Br250-350. Плюс €65 (віза) і Br40 за консульскія зборы.
Балгарская віза
Тут выдаюць турыстам у асноўным аднаразовыя візы, пад паездку, але можна паспець нават да канца жніўня. Трэба толькі пацвярджэнне аплаты жылля і транспарту, а калі плануеце ехаць на аўто - паказаць пасведчанне, страхоўку і рэзерваванне транзітных гатэляў па маршруце руху.
Цэны запісу і пакет дакументаў пачынаюцца ад Br350. Плюс аплата ў візавым цэнтры блізу Br280.
Румынская віза
Тут можна атрымаць яе пад паездку ці нават да паўгода (візавая гісторыя можа падыграць). Таксама патрабуецца пацвярджэнне аплаты гатэля, а не проста рэзерваванне. Але чакаць трэба блізу двух месяцаў.
Візавая падтрымка каштавацьме Br600. Але ёсць вялікая рызыка адмовы.
Спецыялісты сцвярджаюць, што ў славацкай амбасадзе такая ж сітуацыя. Шанец запісацца зведзены да мінімуму - дзве візы на месяц.
Італійская віза
Супярэчлівая, але самая жаданая - патрапіць самастойна на падачу складана. Візавы цэнтр Італіі прыпыніў выдачу слотаў праз электронную сістэму запісу. Але аднавіў жывую чаргу ў «сшытак».
Італія можа паставіць візу і на паўгода, і на год у чысты пашпарт. Аднак і ў гэтым выпадку планаваць паездку трэба ўжо на восень.
Нават з даражэйшымі варыянтамі (€600) падачы праз пасярэднікаў разглядаць заяўку ў летні сезон могуць месяц.
Гішпанская віза
Турагенцтву давядзецца заплаціць ад Br350, яшчэ ад Br250 - за пакет дакументаў і плюс Br280 - пры іх падачы. А яшчэ дадамо Br200 за прэміум-сэрвіс. Разам - да Br1100, а тэрмін разгляду - 45 дзён.
Візу ж адкрыюць максімум на тры месяцы, калі пашанцуе. Важна пацвердзіць фінансавую заможнасць з разліку €108 на кожны дзень знаходжання - на гэта гішпанцы звяртаюць асаблівую ўвагу.
Французская віза
Тураператары сыходзяцца ў меркаванні аб лаяльнасці пасольства. Але візавых цэнтраў няма. Як і самастойнай электроннай рэгістрацыі.
Візы тут даюць або пад тур (планаваць паездку трэба моцна загадзя), або на запрашэнне ад сваякоў і сяброў. Не выключэнні і бізнэс-камандзіроўкі, а таксама гуманітарныя праграмы.
Чаканне - ад некалькіх месяцаў. Паслугі пасярэднікаў таксама могуць пацягнуць на €600, так што вакацыі ў Парыжы сапраўды не будуць таннымі.
Нямецкая віза
Нямеччына не песціць падарожнікаў хуткім запісам. Для падачы дакументаў давядзецца назапасіцца цярпеннем на год. Затое тут ахвотна выдаюць шматразовую візу.
Для турыстычнай запатрабуецца рэзерваванне гатэля, авіяквіткоў ці маршрутны ліст з указаннем гарадоў, у якіх плануеце спыняцца. Немцы правяраюць не толькі рэзерваванне, але і засяленне. Калі турыст не прыехаў, гэта можа прывесці да ануляцыі візы і дэпартацыі.
Выдаткі на паслугі агенцтва (ад Br250). А яшчэ на саму візу (€35).
Польская віза
Самы дарагі варыянт - ва ўсіх сэнсах слова, а яшчэ лідар у адмовах. Пад тур візу не дадуць, а запісацца ў цэнтр для падачы самому - цэлы квэст.
Вольных слотаў у сотні разоў менш, чым ахвотных зарэгістравацца. Пры гэтым трэба прайсці верыфікацыю ў сістэме, дзе лік ідзе на хвіліны.
Кошт рэгістрацыі - ад Br600 да Br1300 за чалавека. Затое абзавесціся візай можна ўсяго за два тыдні пры спрыяльнай пастанове консула.