ЦАХАЛ забраў целы пяці закладнікаў з сектара Газа
- 25.07.2024, 19:10
- 4,478
![ЦАХАЛ забраў целы пяці закладнікаў з сектара Газа](https://i.c97.org/ai/566804/aux-head-1696697680-20231007_cahal_Dwgf_360.jpg)
Усе яны былі забітыя падчас нападу тэрарыстаў ХАМАС 7 кастрычніка.
Войска абароны Ізраіля (ЦАХАЛ) вярнула на тэрыторыю краіны з сектара Газа целы пецярых закладнікаў. Пра гэта ў чацвер, 25 ліпеня, ЦАХАЛ паведаміў у сваіх сацсетках.
У ЦАХАЛ расказалі, што аперацыя па эвакуацыі цел праходзіла ў сераду, 24 ліпеня. Яе ажыццявілі вайскоўцы ізраільскага войска супольна з агентамі спецслужбы «Шын Бэт». Усе закладнікі, чые целы ўдалося вярнуць дадому, былі забітыя падчас атакі 7 кастрычніка і адвезеныя ў сектар Газа ўжо мёртвымі.
У заяве ЦАХАЛ адзначаецца, што целы закладнікаў былі знойдзеныя ў тунэлі на глыбіні амаль 20 метраў пад гуманітарнай зонай у раёне горада Хан-Юніс на поўдні сектара. «Гэта яшчэ адзін прыклад таго, як ХАМАС цынічна эксплуатаваў гуманітарную зону і выкарыстоўваў яе для ўтрымання ў палоне ізраільцаў, забітых і выкрадзеных 7 кастрычніка», - гаворыцца ў паведамленні.