Як пусцеюць беларускія гандлёвыя цэнтры
7- 25.07.2024, 11:26
- 19,194
![Як пусцеюць беларускія гандлёвыя цэнтры](https://i.c97.org/ai/604173/aux-head-1721895967-20240725_impuls_360.png)
Прыклад менскага «Імпульсу».
У гандлёвым цэнтры «Імпульс», дзе ў пачатку 2000-х зашкальвала наведвальнасць, а ў выходныя было проста не праціснуцца, сёння ў будны дзень зусім нешматлюдна, піша «Салiдарнасць».
Прадаўцы ўважліва сочаць за пакупнікамі, гатовыя ўсё расказаць пра свае тавары і дапамагчы выбраць патрэбны.
![](https://i.c97.org/ai/604173/aux-1721895777-impuls1-25.jpg)
Левае крыло, калі заходзіць з цэнтральнага ўваходу, перагароджанае. Боксы, у якіх менчукі звыклі закупляць невысокімі коштамі мыла, пенкі для мыцця, гелі для душа, крэмы для твару і целы, УФ-абарону ад сонца ад Nivea, Fa і іншых брэндаў, а таксама дэкаратыўную касметыку L'Oréal, Bourjois і т.д. .д., – не працуюць.
![](https://i.c97.org/ai/604173/aux-1721895777-impuls2-25.jpg)
У аддзелах правага крыла, у тым ліку ў новай зале - прадаюць, у асноўным, фарбы, шампуні і касметыку для валасоў і скуры галавы, лакі і інструменты для майстроў манікюра і педыкюра, абсталяванне для нарошчвання пазногцяў.
![](https://i.c97.org/ai/604173/aux-1721895777-impuls4-25.jpg)
Ёсць некалькі аддзелаў элітнай, як напісана на шыльдах, парфумерыі, боксы з біжутэрыяй, шпількі і гумкі для валасоў, парыкі. Таксама на першым паверсе можна набыць сонцаахоўныя акуляры, шкарпэткі і калготкі, купальнікі і жаночую бялізну.
На другім і трэцім паверхах прадаюцца сезоннае летняе адзенне і абутак, торбы. Таксама на другім паверсе з'явілася новае крыло, якое адрозніваецца ад звыклага "Імпульсу" прасторам звонку і ўнутры боксаў. Усё расстаўленае і вывешанае, як у вялікіх крамах, ёсць прымерачная. Аднак пакупнікоў на другім і трэцім паверхах яшчэ менш, чым на першым.
Зніжак і распродаж у гэтыя дні заўважана не было.
![](https://i.c97.org/ai/604173/aux-1721895777-impuls7-25.jpg)
На «брэндавае» летняе адзенне, вырабленае ў Кітаі, кошты ад 30 да 150 беларускіх рублёў. Торбу з лагатыпам запаветнага вядомага брэнда можна купіць за 50 рублёў.
Хоць "Імпульс" і размяшчаецца ў выгадным для гандлю месцы (побач метро і рынак Камароўка), але побач шмат іншых пляцовак-канкурэнтаў. Гандлююць у "Імпульсе", як і раней, у асноўным індывідуальныя прадпрымальнікі, якія прывозяць, у асноўным, тавары з Расеі.