У Расеі са строю выйшлі 5 з 18 найноўшых вайсковых самалётаў Іл-76
10- 20.07.2024, 20:52
- 22,126
![У Расеі са строю выйшлі 5 з 18 найноўшых вайсковых самалётаў Іл-76](https://i.c97.org/p/articles/2015/ai-153392-aux-head-201505029_il_26_t.jpg)
Справа аказалася ў адной дэталі.
У Маскоўскай вобласці завялі крымінальную справу супраць кіраўніцтва Балашыхінскага ліцейна-механічнага заводу, які быў пастаўшчыком падшыпнікаў для вайсковых самалётаў Іл-76МД-90А. Пра гэта паведамляе «Коммерсантъ».
Каб не зрываць замову Мінабароны РФ, пастаўшчык закупляў падшыпнікі невядомага паходжання, якія не адпавядалі патрабаванням і былі ўсталяваныя на самалёты ў перыяд з 2017 да 2022 года. Гэтыя падшыпнікі пастаўляліся ў складзе колаў КТ199 і суправаджаліся падробленымі дакументамі, якія сцвярджаюць, што яны прайшлі праверку Мінабароны.
Выкарыстанне няякасных падшыпнікаў прывяло да выхаду са строю і спынення эксплуатацыі пяці самалётаў Іл-76МД-90А.
Паводле падлікаў праекта «Важных гісторый», у канцы 2023 года на балансе Мінабароны знаходзілася ўсяго 18 такіх самалётаў, з якіх большая частка (11) была пастаўленая ў 2022-2023 гадах.