«Чакаем сапраўднай грыбной хвалі»
10- 20.07.2024, 15:18
- 8,866
![«Чакаем сапраўднай грыбной хвалі»](https://i.c97.org/ai/603610/aux-head-1721477170-20240720_lisiczki_360.png)
Беларускія грыбнікі падзяліліся фота з ураджаем з лесу.
Пасля чэрвеньскага грыбнога ажыятажу ў Беларусь прыйшла ўстойлівая засуха, якая літаральна папяліла грыбніцы. Пасля моцных дажджоў "ціхія паляўнічыя" сцішыліся ў трапяткім чаканні з'яўлення грыбоў. Аднак доўгія тыдні сабраць чагосьці, акрамя лісічак, ніяк не ўдавалася. Як змянілася сітуацыя за апошні тыдзень?
У галоўнай суполцы грыбнікоў Беларусі ў ВК фотасправаздачы з ураджаямі з лесу публікуюцца штодзень, піша Telegraf.news.
У пачатку ліпеня знайсці ў лесе нешта акрамя лісічак доўга не ўдавалася. Шматгадзінныя паходы часта заканчваліся толькі поўнымі кошыкамі гэтых грыбоў.
Саўякі, абабкі і самыя жаданыя баравікі сустракаліся рэдка і часта маленькага памеру, што сведчыла аб тым, што грыбніцам трэба больш часу для аднаўлення.
Цяпер грыбнікі па-ранейшаму збіраюць шмат лісічак, якімі працягваюць выхваляцца. Некаторыя пачалі знаходзіць нават асобныя экзэмпляры чорных лісічак, актыўны рост якіх звычайна прыпадае на жнівень-верасень.
![](https://i.c97.org/ai/603610/aux-1721477021-photomix-image-89.jpg)
“Мазырскі раён. Першы выезд пасля анамальнай спякоты і наступнага ўрагану. Акрамя лісічак нічога няма, але лісічак вельмі шмат”, — напісаў адзін з беларусаў у суполцы пра сітуацыю ў лесе пад Мазыром на 20 ліпеня.
![](https://i.c97.org/ai/603610/aux-1721477021-583f4da8-9f9b-45d0-8006-d1b21f96046b.jpg)
Фота ўраджаю Міхаіла Летава пад Барысавам.
“25 літраў у два нажы за дзве гадзіны”, - коратка рэзюмаваў яшчэ адзін грыбнік з-пад Барысава.
Аднак многія “ціхія паляўнічыя”адзначылі разнастайнасці грыбоў, якія цяпер можна знайсці ў лесе.
![](https://i.c97.org/ai/603610/aux-1721477021-photomix-image-91.jpg)
“Усё больш краснагаловікаў і лісічак. Надвор'е становіцца больш камфортным і лес дастаткова вільготны. Чакаем сапраўднай грыбной хвалі”, - распавяла аб сваіх знаходках грыбаўніца з Менскай вобласці.
Відэа з сабраным ураджаем 19 ліпеня з Telegraf.news падзяліўся і прафесійны грыбнік Аляксандр Гарбацэвіч.
Паводле ягоных слоў, апошнім часам ён збірае лісічкі ўсё менш і засяродзіўся на пошуку баравікоў. Самыя прыгожыя знаходкі грыбнік, блогер і праграміст практычна штодня публікуе на сваёй старонцы ў Instagram.
Таксама адзначыла з'яўленне баравікоў і саўякоў, але пакуль "у абмежаваных колькасцях" і беларуская пісьменніца Наталля Батракова. Яна таксама актыўна вядзе блог "ГрыбКіно" на YouTube і дзеліцца сваімі знаходкамі ў Instagram.