Кошты кавы ўстанавілі рэкорд росту
4- 18.07.2024, 12:55
- 4,896
![Кошты кавы ўстанавілі рэкорд росту](https://i.c97.org/ai/313129/aux-head-1542445693-2018_11_12_port_360.jpg)
І гэта яшчэ не пік.
Міжнародныя кошты кавы выраслі прыблізна на 20% у мінулым квартале праз экстрэмальную спякоту ў асноўных рэгіёнах вырошчвання кавы ў Азіі.
Кошты кавы рабуста выраслі да рэкорднага ўзроўню ў чацвер, бо падзенне экспарту з В'етнама і пагаршэнне перспектыў ураджаю ў Бразіліі падтрымалі цэны, у той час як кава арабіка паднялася да піка за два з паловай гады.
Ф'ючэрсы на лонданскую каву гатунку рабуста выраслі на 18,1% да канца чэрвеня ў параўнанні з канцом сакавіка, дасягнуўшы рэкорднага ўзроўню 4394 даляры за тону, піша nv.ua са спасылкай на Nikkei Asia. Ф'ючэрсы на каву гатунку арабіка таксама павялічыліся на 20,6%.
Рост прыкмет таго, што ўраджай кавы ў Бразіліі будзе меншым, чым чакалася, таксама падтрымаў рост цаны. Вераснёўскія кошты кавы арабіка KCc2 падаражэлі на 0,45% да $2,4465 за фунт пасля дасягнення максімуму за два з паловай гады $2,5530.
Асноўнай прычынай росту коштаў кавы сталі цеплавыя хвалі ў Паўднёва-Усходняй Азіі. З красавіка сярэдняя тэмпература ў В'етнаме, Тайландзе і на Філіпінах была вышэйшай за норму і дасягала 48°C.
В'етнам вырабляе блізу 40% кававых зерняў гатунку рабуста ў свеце, якія выкарыстоўваюцца для гатавання распушчальнай кавы. Аднак яго фермеры сутыкаюцца з моцнай засухай, што выклікае асцярогі з нагоды стану восеньскага ўраджаю.
«Ураджай гатунку рабуста летась быў дрэнным, таму кошты выраслі праз боязь, што другі год запар будуць дрэнныя ўраджаі, што можа падоўжыць напружаны баланс попыту і прапановы», – сказаў Масанабу Такана, які працуе ў аддзеле кавы і гарбаты ў гандлёвым доме S. Ishimitsu & Co ў Кобе.