Праз непагадзь у Беларусі 13-14 ліпеня загінулі шэсць чалавек
1- 15.07.2024, 18:03
- 5,252
![Праз непагадзь у Беларусі 13-14 ліпеня загінулі шэсць чалавек](https://i.c97.org/ai/602962/aux-head-1721055827-20240101_skriin_360.jpg)
Звесткі МНС.
Шэсць чалавек, у тым ліку двое дзяцей, загінулі ў Беларусі за два дні непагадзі, паведаміў начальнік галоўнай управы дзяржаўнай сістэмы папярэджання і ліквідацыі надзвычайных сітуацый і грамадзянскай абароны МНС Ігар Хадановіч у тэлеграм-канале МНС.
«З прычыны праходжання навальнічнага фронту і моцнага ветру пацярпелі 330 населеных пунктаў, зафіксаваныя больш за 1200 выпадкаў падзення дрэў, пашкоджаныя дахі больш чым 700 жылых дамоў», — сказаў ён.
Са слоў Хадановіча, пад паваленымі дрэвамі і элементамі дахаў загінулі шэсць чалавек, з іх двое дзяцей, траўмаваныя - 15.
Пры гэтым ён адзначыў, што пры высокіх тэмпературах магчымыя значныя змяненні варункаў надвор'я.
«Гэта можа суправаджацца шквалістымі парывамі ветру, навальніцамі градам, падзеннем дрэў», - падкрэсліў Хадановіч.
Таму МНС настойліва рэкамендуе ў непагадзь абмежаваць выхад з будынкаў, не хавацца пад дрэвамі, за рэкламнымі шчытамі, прыпынкамі, будынкамі, бо магчымае падзенне дахавых матэрыялаў.