«Шыфер разбіў акно і ўляцеў проста ў пакой»
5- 15.07.2024, 15:35
- 5,880
![«Шыфер разбіў акно і ўляцеў проста ў пакой»](https://i.c97.org/ai/602946/aux-head-1721046927-20240715_dom_360.jpg)
Як перажыў ураган пінскі аграгарадок.
Навальнічны фронт прайшоў па тэрыторыі Берасцейскай вобласці 14 ліпеня. Найбольшую шкоду стыхія прычыніла аграгарадку Лапаціна ў Пінскім раёне. Там пяціхвілінны ўраган пашкодзіў больш за 60 дамоў, піша БелТА.
Ураган наляцеў на Лапаціна 14 ліпеня а 12.30. Ён доўжыўся літаральна пяць-сем хвілін. Моцны вецер суправаджаўся праліўным дажджом і градам памерам з перапёлчынае яйка. У выніку пашкоджаны дамы, пабудовы, сельскагаспадарчыя будынкі і іншыя збудаванні. Сарваныя дахі, паваленыя дрэвы, платы, апоры лініі электраперадачы. Сваю дапамогу мясцовым жыхарам надае мясцовая гаспадарка, супрацоўнікі МНС, энэргетыкі, будаўнікі, работнікі лясгаса, ЖКГ.
![](https://i.c97.org/ai/602946/aux-1721046958-photo_2024-07-15_12-18-17.jpg)
— Мне патэлефанавала стараста аграгарадка і расказала, што тут робіцца такое, чаго яшчэ ніколі не было. Я адразу скокнуў у аўто і прыехаў сюды. У Лапаціна немагчыма было па цэнтральнай вуліцы праехаць: дарогі былі перацятыя, дрэвы паваленыя, правады абарваныя. Аператыўна ўсе службы сабраліся і пачалі ліквідоўваць наступствы непагадзі. Асабліва пацярпела вуліца Калгасная. Там дамоў 20, у 13 з іх дахі цалкам знятыя, - апісаў сітуацыю старшыня Лапацінскага сельсавета Васіль Шаўчук. Ён дадаў, што першачарговая ўвага нададзеная дахавым работам.
![](https://i.c97.org/ai/602946/aux-1721046958-photo_2024-07-15_12-18-18_2_.jpg)
Вяскоўцы адчулі шок ад наступстваў урагану. Са слоў мясцовых жыхароў, усё здарылася так хутка, што яны не паспелі нічога зразумець.
- Сын сядзеў з унучкамі ў зале. Шыфер разбіў акно і ўляцеў проста ў пакой. Добра, што сын паспеў дзяцей схаваць, - расказаў жыхар мястэчка.
Яго суседка прызналася, што дагэтуль яшчэ не прыйшла ў сябе.
- Гэта было імгненна: пачаўся дождж, а потым град. Было шумна, а потым рэзка ўсё сціхла. Усюды ўсё палегла. Дагэтуль не магу ачомацца. Гэта было страшна. Платы разносіла, дах дома і хлява раскрыла, выцяжку ад газавай трубы знесена, - распавяла пенсіянерка.
- Вядома, стрэс быў, але людзі зразумелі, што не застануцца адны і атрымаюць дапамогу. Атмасфера зараз нармальная. Тэхніка працуе, падвозяцца будматэрыялы. Задзейнічаны ўсе службы, усе працуюць, - падкрэсліў старшыня сельсавета.
Нагадаем, навальнічны фронт пракаціўся па краіне 14 ліпеня. Парывы ветру дасягалі 29 м/с. Ад непагадзі пацярпелі 268 населеных пунктаў (Берасцейская вобласць - 12, Гомельская - 249 і Магілёўская - 7). Пашкоджаны дахі 586 дамоў, 7 аб'ектаў сацкультбыту і 146 сельскагаспадарчых будынкаў.
«Ад дрэў і элементаў дахаў, якія ўпалі, загінулі чатыры чалавекі (з іх двое дзяцей), траўмаваныя пяцёра (з іх чатыры дзіцяці)», — распавялі ў МНС.