«Мы ўтрымлівалі дах, потым у дамку парывам ветру вырвала дзверы»
9- 15.07.2024, 10:39
- 8,100
![«Мы ўтрымлівалі дах, потым у дамку парывам ветру вырвала дзверы»](https://i.c97.org/ai/338699/aux-head-1561206448-20190622_pogoda_mordor_360.jpg)
Мянчанка расказала аб смяротным урагане на Вілейскім вадасховішчы.
Жыхарка Менска стала відавочцай урагану, які накрыў кемпінг на Вілейскім вадасховішчы і забраў жыццё маладога мужчыны. Яна расказала газеце "Минская правда" падрабязнасці таго фатальнага дня.
- У нас быў арганізаваны турзлёт і пражыванне ў намётах на кемпінгу “Клевое место” з пятніцы да нядзелі. У пятніцу ішоў дождж, але потым распагодзілася, і мы добра адпачылі. А ў суботу ў нас былі квэсты, пасля сплаў на байдарках і пасля абеду вельмі рэзка пачалася непагадзь. Пайшоў моцны дождж і вецер. Каб схавацца, мы забеглі ў дамок і зразумелі, што ад моцнага ветру галінкі дрэў абломваюцца і ляцяць на будынак. Дом пачало трэсці. Мы ўтрымлівалі дах, потым у дамку парывам ветру вырвала дзверы - гэта было вельмі страшна, праўда. 20 чалавек нашай кампаніі туліліся ў гэтай хацінцы, чакалі, пакуль усё скончыцца.
Калі мы паглядзелі ў акенца, то ўбачылі, што адно з дрэў упала проста на нашу палатку і знесла шацёр, дзе знаходзілася наша кухня. Дзве суседнія альтанкі проста перакулілісяся.
![](https://i.c97.org/ai/602894/aux-1721029107-1.jpg)
У нейкі момант я сама пачала развітвацца з жыццём. Я думаю, як і ўся кампанія, якая таксама там знаходзіліся. Мы не разумелі, калі гэта скончыцца. Не ведаю, колькі часу гэта доўжылася, але адчуванне, што гэта было вельмі доўга. І страх быў таксама вельмі моцны.
Адзін хлопец з нашай кампаніі спаў у намёце ў той час, калі пачалі ляцець галінкі. Ён проста пачуў, прачнуўся і пабег хутчэй да нас у дамок. Карацей, выратавалі яго нейкія вышэйшыя сілы.
Хоць кемпінг у нас быў арандаваны да нядзелі, мы з'ехалі дадому ў суботу ўвечары, адразу пасля ўрагану.
Усе нашы рэчы прамоклі, бо ляжалі ў намётах, патанулі тэлефоны і паўэрбанкі. Усе торбы былі мокрыя наскрозь, а палаткі проста знесла.
Пацярпелых сярод нас не было.
І толькі калі мы прыехалі дадому, даведаліся, што там хлопец загінуў. Ён быў з іншай кампаніі, - распавяла дзяўчына.