Палітвязень ксёндз Анджэй Юхневіч знаходзіцца ў знясіленым стане
7- 13.07.2024, 14:29
- 8,362
![Палітвязень ксёндз Анджэй Юхневіч знаходзіцца ў знясіленым стане](https://i.c97.org/ai/600128/aux-head-1719172671-20240101_wilian_360.jpg)
Святар пазбаўлены шматлікіх базавых чалавечых патрэбаў.
Пробашч рымска-каталіцкай парафіі ў Шуміліне айцец Анджэй Юхневіч знаходзіцца ў зняволенні ўжо больш за два месяцы. Да гэтага часу невядома, у чым яго абвінавачваюць.
Сайт Katolik.lifе паведамляе, што вернікам парафіі Маці Божай Фацімскай у Шуміліне дагэтуль невядома, у чым менавіта і паводле якога артыкула абвінавачваюць іх пробашча Анджэя Юхневіча – гэта тлумачаць таямніцай следства. У святара ёсць адвакат, але ён таксама нічога не паведамляе, бо вымушаны быў даць падпіску аб неразгалошванні.
Адзінае, што перадалі вернікам – святар знаходзіцца ў знясіленым стане, ён быў пазбаўлены шматлікіх базавых чалавечых патрэбаў. Да прыкладу, толькі нядаўна яму далі магчымасць прыняць душ – пасля амаль двух месяцаў зняволення.
Вернікі пішуць пробашчу лісты ў СІЗА, перадаюць перадачы, каб ён не адчуваў сябе ў адзіноце, імкнуцца хадайнічаць перад органамі следства і пракуратуры, каб яго выпусцілі з-пад варты пад падпіску аб нявыездзе. У парафіі пісалі калектыўны зварот у апарат упаўнаважанага ў справах рэлігій і нацыянальнасцяў, але там адказалі, што не могуць нічым дапамагчы ў гэтай справе.
Пра дзеянні з боку касцельных структураў нічога невядома – публічных малітваў, заяваў, нагадванняў пра сітуацыю святара і якой-небудзь мінімальнай інфармацыі пакуль не было, адзначае Katolik.lifе.
Анджэй Юхневіч быў затрыманы 8 траўня. Спачатку святара абвінавацілі ў тым, што ў лютым 2022 года ён размясціў на фота свайго профілю ў Facebook выяву бел-чырвона-белага сцяга і сцяга Украіны. Юхневіча чатыры разы запар асуджалі да 15 сутак адміністрацыйнага арышту, а потым распачалі крымінальную справу і перавялі ў СІЗА. Праваабаронцы прызналі яго палітвязнем.