Сікорскі: Расейскія ракеты перасеклі тэрыторыю Беларусі і ўвайшлі ў паветраную прастору Польшчы
3- 13.07.2024, 13:12
- 15,910
![Сікорскі: Расейскія ракеты перасеклі тэрыторыю Беларусі і ўвайшлі ў паветраную прастору Польшчы](https://i.c97.org/ai/290824/aux-head-1526968670-20180522_raketa_t.jpg)
Польшча разглядае прапанову збіваць ракеты РФ над Украінай.
Варшава разглядае прапанову Кіева збіваць расейскія ракеты, якія накіроўваюцца ў бок Польшчы, пакуль яны знаходзяцца ў паветранай прасторы Украіны. Гэтая прапанова была ўключаная ў пагадненне аб супольнай абароне паміж дзвюма краінамі, падпісанае падчас візіту прэзідэнта Украіны Уладзіміра Зяленскага ў Варшаву, піша ВВС.
«На гэтым этапе гэта ўсяго толькі ідэя. У нашым пагадненні гаворыцца, што мы вывучым гэтую ідэю», – заявіў міністр замежных справаў Польшчы Радаслаў Сікорскі Амерыканскаму інстытуту прадпрымальніцтва ў Вашынгтоне.
Ён паведаміў, што некаторыя расейскія ракеты, выпушчаныя з раёна Санкт-Пецярбурга па ўкраінскіх цэлях у раёне Львова, недалёка ад польскай мяжы, перасеклі тэрыторыю Беларусі і ўвайшлі ў паветраную прастору Польшчы прыкладна на 40 секундаў, перш чым павярнуцца да сваіх цэляў ва Украіне.
У той самы час Сікорскі прызнаў, што такі кароткі прамежак часу пакінуў Польшчы мала часу для рэагавання.
Аднак тэарэтычна гэтая прапанова будзе распаўсюджвацца на любую ракету, якая перасякае заходнюю Украіну ў кірунку Польшчы.
«Мы з'яўляемся прыфрантавой дзяржавай, і расейскія ракеты парушаюць нашую паветраную прастору. Мы мяркуем, гэта памылкова», – заявіў міністр.
Ён растлумачыў, у чым заключаецца дылема. Калі Варшава будзе збіваць расейскія цэлі толькі тады, калі яны ўвойдуць у паветраную прастору Польшчы, то аскепкі будуць уяўляць пагрозу для грамадзянаў і ўласнасці. Аднак Кіеў, паводле ягоных словаў, кажа, што не будзе пярэчыць, калі ракеты будуць збітыя польскай зброяй у паветранай прасторы Украіны, калі пагражае немінучая небяспека пранікнення на тэрыторыю Польшчы.
«На маю думку, гэта самаабарона, але мы вывучаем гэту ідэю», – сказаў Сікорскі.