Сіноптыкі паабяцалі беларусам вяртанне «сапраўднага лета» з +32°С

Ці надоўга?

Сіноптыкі агучылі прагноз надвор'я на наступны тыдзень, 17-23 чэрвеня. З іх слоў, пасля дастаткова прахалоднага перыяду з халоднымі начамі і вельмі сціплымі для чэрвеня дзённымі максімумамі ў Беларусь, нарэшце, вяртаецца «сапраўднае лета» з трыццаціградуснай спякотай. Даведаліся, калі чакаць пацяплення, ці спыняцца ліўні з навальніцамі, якія ўжо нарабілі бяды на мінулым тыдні і ці надоўга затрымаецца спякотнае надвор'е.

Як распавялі аўтары Telegram-канала аб надвор'і Nadvorie, у гэтыя выходныя на Беларусь пачаў надыходзіць чарговы паўднёвы цыклон з цэнтрам над Крымам. Гэта праз яго Гомельшчыну зноў накрылі дажджы з навальніцамі, але менавіта той цыклон, са слоў спецыялістаў, абяцае Беларусі прыкметнае пацяпленне.

«У далейшым з прасоўваннем паўднёвага цыклону на поўнач на тэрыторыю рэспублікі пачне распаўсюджвацца цяплейшая і няўстойлівая паветраная маса з поўдня Еўрапейскай тэрыторыі Расеі. Сапраўднае лета зноў вяртаецца», - запэўнілі спецыялісты.

Ужо вечарам нядзелі, 16 чэрвеня, Чарнаморскі дажджлівы цыклон «Н» перамесціцца на поўнач, а Беларусь будзе «ўцягнутая ў яго цыркуляцыю», што азначае новую порцыю ліўняў з навальніцамі пры тэмпературы паветра +22..+25°С.

«Цікавае надвор'е будзе, калі цыклон перамесціцца на поўнач і яго цэнтр апынецца пад Бранскам, Расея. Гэта адбудзецца да поўдня панядзелка, 17 чэрвеня: навальніцы і залевы на ўсходняй палове краіны, месцамі нават вельмі інтэнсіўныя», - распавялі аўтары Telegram-канала Nadvorie.

Прасоўванне Чарнаморскага цыклону «Н» 16 чэрвеня 2024 года

Паводле прагнозаў спецыялістаў, 16 чэрвеня паступленне халоднага паветра ў Беларусь спыніцца і «паветра прагрэецца да нормы», а бліжэй да серады, 19 чэрвеня, на захад краіны наблізіцца «хваля вельмі гарачага паветра», у выніку чаго ў дзённыя гадзіны паветра ў асобных раёнах можа прагрэцца да +29..+32°С.

Аднак, паводле меркавання спецыялістаў, такая спякота ў Беларусі не затрымаецца. Такой жа думкі прытрымліваецца і беларускі сіноптык Дзмітры Рабаў. У сваім штотыднёвым прагнозе на тэлеканале ОНТ ён заявіў, што толькі ў сярэдзіне наступнага тыдня беларусаў чакае спякотнае надвор'е, а сярэдняя тэмпература паднімецца вышэй за кліматычную норму. З яго слоў, у чацвер, 20 чэрвеня, тэмпература паветра можа дасягаць +27…+33°C, у пятніцу, 21 чэрвеня — да +26…+32°C і толькі пры дажджах яна будзе апускацца на 3-5 градусы ніжэй.

«Але разлічваць на доўгі перыяд сухога і ўстойлівага надвор'я, на жаль, не даводзіцца. Атмасферныя франты і няўстойлівыя вільготныя паветраныя масы па-ранейшаму будуць прыносіць з сабой дажджы, навальніцы і парывісты вецер», - папярэдзіў Рабаў.

З яго слоў, ужо ў наступныя выхадныя, 22-23 чэрвеня, у Беларусь вернецца пераменная воблачнасць, пройдуць кароткачасовыя дажджы з навальніцамі, чакаюцца начныя туманы. Начная тэмпература пры гэтым будзе вагацца ў дыяпазоне +11…+17°C, а дзённая ў суботу не паднімецца вышэй за +21…+27°C па краіне, у нядзелю — у дыяпазоне +20…+27°C.

Вось які прагноз па сярэдняй дзённай тэмпературы на тыдзень агучыў Дзмітрый Рабаў для беларускіх рэгіёнаў.