Як беларусам атрымаць турыстычную візу ў Польшчу
3- 31.05.2024, 17:27
- 10,080
![Як беларусам атрымаць турыстычную візу ў Польшчу](https://i.c97.org/p/articles/ai-161807-aux-head-polskaja_viza_360.jpg)
Колькі каштуюць паслугі пасярэднікаў?
Беларусы па-ранейшаму маюць цяжкасці з тым, каб выехаць у краіны Еўразвязу ў адпачынак або пабачыцца са сваімі сябрамі і блізкімі. Самастойна запісацца на падачу дакументаў на візу практычна немагчыма і даводзіцца рабіць гэта праз фірмы-пасярэднікі.
Колькі каштуюць паслугі, які парадак дзеянняў і якія дакументы неабходна падрыхтаваць - даведаўся «Флагшток» у адной з такіх фірмаў, дзе цэннік адзін з самых нізкіх.
Журналісты выбралі адзін з найбольш папулярных кірункаў - турыстычная паездка ў Польшчу па шматразовай шэнгенскай візе (90 дзён знаходжання цягам года).
Консульскі збор за польскую турыстычную візу складае 35 еўраў (плюс 11 еўраў — сэрвісны збор у візавым цэнтры), але за запіс на падачу дакументаў з дапамогай пасярэдніка давядзецца заплаціць дадаткова 690 рублёў.
Час чакання на наведванне візавага цэнтра ад моманту звароту да пасярэдніка і ўнясення папярэдняй аплаты ў суме 300 рублёў - 3-4 тыдні. Пры гэтым, на падачу дакументаў жыхарам Гомеля давядзецца ехаць у Менск.
Акрамя запоўненай візавай анкеты і пашпарта неабходна падрыхтаваць фота памерам 3.5х4.5, страхоўку на перыяд першай паездкі, даведку з працы аб даходах за апошнія 3 месяцы або выпіску з банка аб суме на рахунку (мінімум 500 еўраў).
Калі афіцыйнага месца працы няма, трэба абавязкова прыкласці дакументы, якія пацвярджаюць «сувязь з радзімай» - да прыкладу, аб праве ўласнасці на кватэру.
Акрамя таго, неабходна прадаставіць пацвярджэнне броні гатэля ў Польшчы на тэрмін, не меншы за тры дні (праз сэрвіс Booking).
«Мы не нясём адказнасць за пастанову консула, пры адмове ў візе мы не вяртаем грошы за паслугі. Дапамагаем з апеляцыяй», - папярэдзіў пасярэднік.
Такія ж умовы - і ў іншых фірмах, але кошты значна вышэйшыя. Адзін з папулярных сэрвісаў апублікаваў увесь цэннік на сваім сайце. Тут польскі шэнген каштавацьме 890-1140 рублёў, а за афармленне гасцявой візы з запрашэннем пасярэднік патрабуе 2490 рублёў.
Танней за ўсё каштуюць паслугі фірмаў па запісе на падачу на нацыянальную візу для тых, хто мае «карту паляка» – 590 рублёў.