Беларускія памежнікі заявілі аб затрыманні байца Замежнага легіёна
9- 31.05.2024, 15:25
- 14,822
![Беларускія памежнікі заявілі аб затрыманні байца Замежнага легіёна](https://i.c97.org/ai/597169/aux-head-1717158280-20240531_menty_360.jpg)
Праз яго хобі.
Сілавікі 29 траўня затрымалі ў Маладзечне мясцовага жыхара, які падазраецца ў занятках кантрабандай. Пра гэта паведамляе прэс-служба Дзяржпагранкамітэта.
У яго доме знайшлі камплектуючыя для зборкі беспілотных лятальных апаратаў, а таксама паветраную вінтоўку «саматужнай вытворчасці», нямецкую вінтоўку Mauser, боепрыпасы калібру 7.62 мм, кулі для дробнакалібернай вінтоўкі, значкі, шэўроны і медалі Французскага Замежнага легіёна.
«Устаноўлена, што мужчына ў перыяд з 2000 да 2005 года праходзіў службу ў «Французскім легіёне» і ўдзельнічаў у баявых дзеяннях на тэрыторыі Афрыкі. Са слоў затрыманага, цяпер яго хобі — зборка беспілотнікаў для ўласных мэт. Акрамя таго, устаноўлена, што мужчына актыўна ўдзельнічае ў абмеркаванні розных тэм у экстрэмісцкіх тэлеграм-каналах», - заявілі ў Дзяржпамежкамітэце.
Нягледзячы на тлумачэнні затрыманага, у ДПК упэўненыя, што беспілотнікі ён збіраў не ў якасці хобі, а «для кантрабандыстаў».
Затрыманага змясцілі ў ізалятар часовага ўтрымання Маладзечанскага РАУС. На яго пачалі крымінальную справу, але не ўдакладнілі, паводле якога артыкула.