У Менску вынеслі прысуд топ-мэнэджарам «Белінвестбанка»
2- 31.05.2024, 12:24
- 6,016
![У Менску вынеслі прысуд топ-мэнэджарам «Белінвестбанка»](https://i.c97.org/p/articles/2015/ai-168301-aux-head-20150910_bel_inwest_bnk_t.jpg)
Суд адбываўся ў закрытым рэжыме.
У Менскім гарадскім судзе вынеслі прысуд у справе экс-кіраўніка «Белінвестбанка» Андрэя Брыштэлева і іншых топ-мэнэджараў. Пра гэта паведамляе «Зеркало» са спасылкай на прэс-службу Генпракуратуры. Суд адбываўся ў закрытым рэжыме.
Андрэя Брыштэлева прызналі вінаватым у атрыманні хабару ў асабліва вялікай суме, асобай, якая займае адказнае становішча (ч.3 арт.430) КК Беларусі. Яго прысудзілі да 12 гадоў калоніі ўзмоцненага рэжыму са штрафам сумай 2 000 базавых адзінак (80 тысяч рублёў).
Былога выканаўчага дырэктара «Белінвестбанка» Андрэя Раманенкі і начальніка аднаго са структурных падраздзяленняў банка Ігара Піскунова прызналі вінаватымі ў злоўжыванні ўладай або службовымі паўнамоцтвамі (ч.2 арт.424). Акрамя таго, Піскунова прызналі вінаватым у дапамозе ў дачы хабару (ч.6 арт. 16, ч.2 арт.431) КК Беларусі. Які прысуд ім вынеслі - не паведамляецца.
Прысуд у законнае дзеянне не ўвайшоў, можа быць абскарджаны і апратэставаны ў апеляцыйным парадку.
Нагадаем, інфармацыя аб затрыманні Андрэя Брыштэлева з'явілася ў канцы красавіка 2022 года. Пасля гэтага «Белінвестбанк» быў некалькі месяцаў «абязгалоўлены». Асноўны акцыянер «Белінвестбанка» - Дзяржкаммаёмасці.
Суд над топ-мэнэджарамі банка пачаўся 5 снежня 2023 года. Ён праходзіў у закрытым рэжыме.