Украіна і Партугалія падпісалі пагадненне пра гарантыі бяспекі
- 28.05.2024, 20:36
- 2,038
![Украіна і Партугалія падпісалі пагадненне пра гарантыі бяспекі](https://i.c97.org/ai/596807/aux-head-1716917764-20240101_udost_360.jpg)
Пагадненне будзе дзейнічаць цягам 10 гадоў.
Прэзідэнт Украіны Уладзімір Зяленскі і прэм'ер-міністр Партугаліі Луіш Мантэнегру падпісалі двухбаковае пагадненне пра гарантыі бяспекі. Лісабон абавязаўся супрацоўнічаць з Кіевам у шэрагу сфераў.
Пра гэта паведамляе прэс-служба Офіса прэзідэнта Украіны.
Як адзначаецца ў дакуменце, Партугалія, сярод іншага, абавязалася падтрымліваць Украіну, каб яна змагла:
ажыццяўляць сваё законнае права на самаабарону і супрацьстаяць будучым узброеным нападам;
абараняць і аднаўляць сваю тэрытарыяльную цэласнасць у межах міжнародна прызнаных межаў;
умацоўваць сваю эканамічную стабільнасць і ўстойлівасць, у тым ліку шляхам аднаўлення, стварэння ўмоваў, спрыяльных для эканамічнага росквіту Украіны;
прадаўжаць укараненне рэформаў, важных для рэалізацыі яе еўрапейскіх і еўраатлантычных імкненняў, сярод іншага на шляху ў Еўрапейскі Звяз і NATO.
Такім чынам, Украіна і Партугалія будуць супрацоўнічаць:
у сферы бяспекі і абароны (Партугалія выдаткуе сама менш 126 млн еўраў на дапамогу Украіне ў 2024 годзе, будзе дапамагаць у мадэрнізацыі УСУ, сярод іншага Паветраных і марскіх сілаў, а таксама будзе дапамагаць у навучанні ўкраінскіх абаронцаў і супрацоўнічаць у сферы абаронна-прамысловага комплексу);
у выпадку магчымага будучага нападу на Украіну (удзел у кансультацыях цягам першых 24 гадзінаў, хуткая дапамога ў сферы бяспекі і эканомікі);
у сферы выведкі і бяспекі (абмен выведнай інфармацыяй і стратэгічнымі выведнымі звесткамі);
у сферы гуманітарнай дапамогі (Партугалія прадоўжыць вылучаць гуманітарную дапамогу Украіне, будзе ўдзельнічаць у аднаўленні краіны);
у палітычнай сферы (удзел у сустрэчах пра ўкраінскую формулу міру, увядзенне санкцый супраць Расеі і падтрымка кампенсацыі стратаў, які нанесла РФ);
Пагадненне будзе дзейнічаць цягам 10 гадоў, але ягоны статус могуць перагледзець, калі Украіна ўступіць у NATO.