Культавага амерыканскага пісьменніка пераклалі на беларускую мову
- 25.05.2024, 12:09
- 4,116
![Культавага амерыканскага пісьменніка пераклалі на беларускую мову](https://i.c97.org/ai/563383/aux-head-1694459881-20230911_king_360.jpg)
Выпускаць свае бэстсэлеры па-расейску ён забараніў.
Раман “Ззянне” культавага амерыканскага пісьменніка Стывена Кінга выйшаў у выдавецтве “Янушкевіч” у перакладзе на беларускую мову - яго ажыццявіла Наста Карнацкая.
Як гаворыцца ў анатацыі, “новая праца Джэка Торэнса ў гатэлі “Аверлук” – выдатная магчымасць пачаць усё спачатку. У міжсезонне ён пераязджае ў стары гатэль са сваёй жонкай Вэндзі і сынам Дэні, каб працаваць зімовым наглядчыкам. Там у Джэка будзе дастаткова часу, каб уз'яднацца з сям'ёй і папрацаваць над уласнымі літаратурнымі творамі. Але з надыходам суровага зімовага надвор'я гэтае ідылічнае месца здаецца ўсё больш аддаленым ад цывілізацыі… і ўсё больш злавесным. І адзіны, хто заўважае дзіўныя і жудасныя сілы, якія сабраліся вакол гатэля з доўгай і жудаснай гісторыяй, - гэта Дэні Торэнс, пяцігадовы хлопчык, адораны "ззяннем".
Раман “Ззянне” быў апублікаваны ў 1977 годзе, а праз тры гады быў бліскуча экранізаваны Стэнлі Кубрыкам. Галоўную ролю адыграў Джэк Нікалсан.
![](https://i.c97.org/ai/596402/aux-1716627799-1.jpg)
З 2022 года кнігі гэтага культавага амерыканскага пісьменніка больш легальна не выходзяць у Расеі. Так Кінг адрэагаваў на агрэсію гэтай краіны ў дачыненні да Украіны.
Купіць кнігу "Ззянне" можна ў краме выдавецтва ў Варшаве (Kłopotowskiego, 4). Жыхары іншых гарадоў і краін змогуць замовіць кнігу найбліжэйшым часам на сайце выдавецтва, на маркетплейсе Allegro або на Amazon (даступная дастаўка ў шэраг краін).